Shuwa jong ka Lockdown jong ka Covid-19, ka jingtreikam jong ka Digital Media kam pat da long eh kata katta bad bun hi ki dang shaniah beit ha ki Electronic Media ne ki News Channel lyngba jong ki T.V bad ki kot khubor ne ki print media. Wat la ki Adroid mobile kila dep doh lypa hynrei kata ka jingsaphriang jong ka jingshakri jong ka Digital Media kam pat da ïoh jaka eh haduh katta katta ha ka imlang sahlang. Hynrei ha ka por jong ka Lockdown ka la long ka lad bah ïa ka digital Media ban ïoh phrung khlieh sha ka imlang sahlang bad ka pyrthei hi baroh kawei. Ha ki por jong ka Lockdown bad shuwa jong ka Lockdown ka jingshakri Gospel lyngba jong ki Electronic Media ki dang long hi kiba remdor ban ïanujor bad ka jingsuk bad jingduna jinglut jong ki digital media. Ka jingroi stet jong ka jingstad teknoloji bad ka jingmih jong ki smart TV bad kiwei pat ki tiar ne devise ka la long ka kabu kaba khraw na ka bynta ban pynphriang ïa kino kino ki khubor bad kumjuh ruh ia ka khubor babha jong ka Gospel.
Hangne ha ka Nongbah Shillong, ngi la lah ban sakhi ïa ka jingshakri Gospel lyngba jong ka digital Media bad ka Potter net ka la long kawei na kiba kum kita ki jingshakri ne Ministry kaba la maitphang ban shakri sha ki paidbah. Naduh shuwa jong ka Lockdown ki riew ieit Gospel kila ju shim ïa ka kabu ban peit bad sngap ïa ka khubor Gospel lyngba jong ka digital media lyngba jong ka Potternet Ministry naduh ki por jong ka Cable TV, ba ryngkat ruh bad lyngba ki bor jong ka internet. Ha kine ki sngi ngi la hadien jong ka Lockdown ngi la lah ban ïohi pat ba jan baroh ki kynhun kiba trei na ka bynta jong ka Gospel ki la ïadon lut ïa la ki jong ki jong ki YouTube Channel ruh kiba ki lasdang ban shakri naduh ki por jong ka Lockdown wat ban pyni da ki live telcast ruh kumjuh.
Kam dei kaba suk ïa ki riewngeit na kawei ka Balang ban leit jingïaseng ne sngap lut ïa ki jinghkai jong kiwei pat ki Balang Khristan, hynrei da ka jingwan jong ka digital media mynta baroh ngi lah ban sngap ïa kino kino ki jinghikai jong kiwei pat ki nongïalam Balang. Kumba ka long baroh shi katta kiba bun ki jinghikai kiba dei jong ka pyrthei ki long beit ha ka ktien phareng, hynrei ka jingïoh rung jong ki jinghikai ha la ka jong ka ktien Khasi ka la ïarap ruh ïa shibun ki riewngeit ban sngwthuh ïa ki jinghikai, wat la baroh shi katta kim sngwthuh ïa ka ktien english ruh. Shisha ym lah ban len ka la long ka jingkyrkhu kaba khraw na ka bynta kito kiba thrang bad kiba sliang namar ba ba wat lehse kim da don ha met kaba koit ba khiah ruh hynrei ki dang ïohlad beit ban sngap bad shah shkor ïa ki jinghikai.
Kumba la ong ba bun hi ki la lah ban ïoh sngew bad ïohi ïa ki jinghikai lyngba jong ki digital media khamtam ha YouTube kum ha Mobile, Computer, Smart TV bad kiwei pat ki lad pathai khubor. Hynrei ka long kaba sngew sam mut ban ïohi ïa ki jingkren jing ki briew kiba la kren lyngba jong kine ki juh hi ki rynsan ne platform kiba long wat ju sngap ïa ki jinghikai bakla lyngba jong ki YouTube. Toi ïa kane ka jingkren ne jinghikai ruh la pynsaphriang lyngba jong ka YouTube hi. Ha kine ki sngi ka long shisha kaba eh ban buh pud ïano ïano ïa kaei ban sngap bad ïa kaei ba ym sngap. Hynrei ka long kaba dei biang ba baroh kin wanrah beit ïa ki jinghikai kaba shisha bad ban pynsuhthied ïa ki riewngeit tang shaphang jong ka jingshisha.
Ngim lah ban len ïa ki jingsniew kiba ka kor internet ka saphriang stet haduh kata katta, hynrei na ka bynta kita kiba don ka jingsngewthuh bad ka bor synshar halor lade, ka long ka jingkyrkhu ba kin lah ban ïohi bad sngap ïa kiba bun ki jingïalap bad ki jinghikai kiba shongsbai. Ka la long ruh ka kabu wat ïa kito ki briew kiba la im ha ka sngewpop bad ka jingpynrem ba kin lah ban ïohsngew ïa ki khubor jong ka jingpynim bad ka kyrmen bad ba sa shisien pat kin ïohbor ban phai sha U Blei bad pyrshang pat ban im ïa ka jingim kaba thymmai jong ka jingkylla kaba mut. Tang da ka bor briew hi yn ym lah ban pyndep ïa ka jingïalap ïa ka Gospel sha ka pyrthei baroh kawei kumba ka Baibl ka ong, hynrei lyngba jong ki bor jong ka Intenet la pyndep ïa kane ka bynta.
