SHILLONG, Jylliew 28: Hadien ba ladep ki jingïalehkai Group Stage ha khmat palat 1 million ki jaka shong ba thylli, ka FIFA Club World Cup ka la jam shakhmat sha ka wat ïakhun knockout kaba lah ban long shen kum ka nongbujli (clone) jong ka Champions League.
Khyndai tylli ki kynhun kiba la rung sha ka Round 16 (Pre Quarter final) ki dei na Europe ryngkat bad saw tylli ki klob na Brazil bad mar kawei na Major League Soccer, Mexico bad Saudi Arabia.
Katkum ka jingkheiñ ba la ïohlum ka jingwantuid u paidbah ka la long kumba 56.7% na ka bynta ki 48 tylli ki jingïalehkai group stage, kiba kynthup ïa ki paidbah kiba don 3,412 bad 6,730 ha Orlando, Florida; 5,282 bad 8,239 ha Cincinnati. Ka FIFA kam shym la ai ïa ki jingkheiñ kaba thikna na ka bynta ka jinglah ban pdiang ïa ki nongpeitkai ha kane ka lympung watla la kyrpad bunsien na ka tnad pathai khubor.
Ka jingwan baroh kaba la pynbna ka long 1.67 million na ka 2.95 million ngut, ha ka jingkheiñ kyllum (average) kaba long 34,746 ngut ha man ki jingïalehkai.
Tang 44.9% kiba la pyndap na ka bynta san tylli ki jingïalehkai ha MetLife Stadium ha East Rutherford, New Jersey, ka jaka ban pynlong ïa ka final jong ka World Cup jong u snem ban wan, bad 50% ha ka Rose Bowl ha Pasadena, California, ka jaka kaba la pynïalehkai ïa ka jingïalehkai final jong u snem 1994.
Napdeng kiwei pat ki jaka 2026, 81.8% ka jingwan tuid u paidbah ba la pyndap ha Miami Gardens, Florida, 61.6% ha Philadelphia, 52% ha Seattle bad 44.3 percent ha Atlanta.
U Bryan Swanson, nongaiktien jong ka FIFA, um shym la jubab satia halor ka jingkyrpad jong u President ka FIFA, u Gianni Infantino, ban ïakren halor kane ka lympung bad ka jingwan poi jong u paidbah sha ki jaka ïalehkai.
Ka FIFA ka la pynmih ïa ka kyrwoh jingpynbna kaba ong: “Ka jingïohnong jong kane ka lympung ka kren hi dalade: ki nongkyrshan na ki 168 tylli ki ri ki la dep thied tiket … ka dak kaba shai jong ka jingkhmih lynti kaba jur bad ka jingpawnam ka pyrthei.”
Ki 12 tylli ki jingïalehkai ban pyni ha ka telebishon ryngkat ki jingkren ha ka ktien Bilat ha ka TNT, TBS bad ka truTV ki la sakhi ïa ka jingdon ki nongpeitkai haduh 360,000 ngut haduh ka sngi Nyngkong, kynthup ïa 409,000 ngut na ka bynta hynñiew tylli ki jingïalehkai ha ka por jan miet bad ki sngi kut taïew.
Ka wat ïakhun kaba ar (Round-16) ka la sdang hynnin ka sngi Saitjaiñ da ka jingïakhun kaba nyngkong hapdeng ar tylli ki klob ba Brazil ka Palmeiras bad ka Botafogo, bad bud sa ka Chelsea pyrshah ïa ka Benfica ha ka step sngi U Blei (1:30AM).
