Mawkyrwat, ‘Nailur 12: Ka District Task Force halor ka Intensified Mission Indradanush kaba hap hapoh ka jingpynïaid jong u bah T. Lyngwa, IAS, Deputy Commissioner ka South West Khasi Hills District ka la pynlong ïa ka jingïakynduh bad ki nongtrei jong ka koit ka khiah bad kiwei kiwei ki shnat treikam sorkar ha Circuit House, South West Khasi Hills District.
Kane ka jingïalang ka long da ka jingthmu ban pynduna ïa ka jingïap jong ki khyllung khynnah lyngba ka jingai tika ne injection ïa ki khyllung kiba hapoh 0 haduh 5 snem bad ruh ïa ki longkmie ba armet hapoh ka Intensified Mission Indradhanush 5.0 Round 2 ka ban sdang naduh ka 11 tarik haduh ka 15 tarik u ‘Nailur, 2023.
Namarkata, u Deputy Commissioner jong ka South West Khasi Hills District u la kyrpad bad pynshlur ïa ki kmie ki kpa bad ïa kiba ha ïing hasem kiba don ki khyllung khynnah kiba hapoh ka 0 haduh 5 snem ban wan shakhmat ban ai injek ïa la ki jong ki khun kumjuh ïa ki longkmie ba armet na ka bynta ban ïoh ïa ka met kaba shait ba khlaiñ bad ban kiar na ka jingngeit biej ne ki khubor hamsaïa kiba lah lah ban pynduh ïa ki lad ki kabu kiba ka sorkar ka ai jingshakri lyngba ka tnat ka koit ka khiah khnang ba iwei i khyllung ruh in ym shah iehnoh khlem da ai injek.
