New Delhi Iaiong 04: Ka jinglong nongïalam jong u Myntri Rangbah duh bad ka jingai bor thymmai ïa ka BIMSTEC – Watla la seng ïa ka BIMSTEC ha u snem 1997, ka jingai bor kaba shisha ïa kane ka kynhun ka la jia hadien u snem 2016 haba u Myntri Rangbah duh Modi u la shim ïa ka sienjam ba kyrpang ban khot ïa ki ri jong ka BIMSTEC na ka bynta ka Leaders’ Retreat ha Goa ha u snem 2016 ha ka por ba pynlong ïa ka BRICS Summit.
Hadien kata, u la phai khmat kyrpang ban kyntiew bad pynkhlaiñ ïa kane ka kynhun bad lyngba jong ka, ka jingïatreilang ha ka thaiñ Bay of Bengal. Ha u snem 2019, u la khot ïa ki nongïalam ka BIMSTEC na ka bynta ka jingïalang pynbam smai jong u.
Ka jingthmu bad ki polisi jong u Myntri Rangbah duh ki wanrah ïa ka jingkhlaiñ ha ka BIMSTEC – Ka kynhun jong ka BIMSTEC ka shaniah ha ka jingïalam jong ka India ban pynïaid shakhmat ïa ka jingthmu jong ka. Da ka jingïalam jong ka India, ka jingphai khmat jong u Myntri Rangbah duh halor ka Neighbourhood First policy, Act East policy, MAHASAGAR vision bad ka Vision for the Indo-Pacific ka la pynkhlaiñ shuh shuh ïa ka kynhun. Kane ka jingïasoh lang jong ki polisi ba la pyni da ka India ka wanrah ïa ki jingïatreilang kiba thymmai bad ki jingmyntoi na ka bynta ki ri kiba long dkhot.
Hapoh ka jingpynïaid jong u Myntri Rangbah duh ka BIMSTEC ka ïoh ïa ka nongrim kaba kham khlaiñ – la seng ïa ka tnad treikam jong ka BIMSTEC katto katne por mynshuwa hynrei ka jingïoh bor shisha ka seng ka la wan hadien ba la pdiang ïa ka riti treikam jong ka ha u bnai Jymmang 2024. Kane ka la kyntiew ïa ka sha ka kyrdan ha kaba ka don bynta ha ki kam jong ki ri bapher bapher, bad ka la buh ïa ki nongrim treikam jong ka. Ka India ka la thung ïa u Indra Mani Pandey, u riewshemphang uba don ka jingshemphang kaba khraw ha ki kam ba bun jait kum u Secretary General. Kine ki jingkylla ki la wanrah ïa ka bor, ka jingthmu bad ka jingtreikam kaba thymmai ha ka kam jong ka kynhun. Ka India ka la pynleit jingmut ha ka jingkyntiew ïa ka bor treikam. Ka la ai pisa USD 1 million sha ka BIMSTEC Secretariat na ka bynta kane ka kam.
Ka India ka la pynlong ïa ka jingïalang jong ki myntri bar ri jong ka BIMSTEC ha u bnai Naitung 2024. Ka la pynlong ruh ïa ka jingïalang jong ki myntri bar ri jong ka BIMSTEC ha ka por ba la pynlong ïa ka UNGA ha u bnai Nailur 2024 ha New York. Ka jingpynïar ïa ka jingthmu jong ka BIMSTEC bad ka jingpynkhlaiñ ïa ka – Hapoh ka jingïalam bad jingpynïaid jong ka India, ka jingthmu jong ka BIMSTEC ka la nang ïar bun shah. La phiah ïa ka bynta jingtreikam jong ka BIMSTEC ha ki hynriew bynta, ha kaba kawei pa kawei ka ri ka lamkhmat kawei- ka India ka lamkhmat ha ka liang ka jingshngaiñ. Kiwei pat ki bynta ki long: Ka khaïi pateng, ka jingbei tyngka bad ka roi ka par (Bangladesh), ka Mariang bad ka jinglong ka suiñbneng (Bhutan), ka rep ka riang bad ka jingpynbiang bam (Myanmar), ka jingïadei hapdeng ki briew (Nepal), ka S & T bad ka jingsaiñdur thymmai (Sri Lanka), Ka jingpynïasoh (Thailand).
Ka jingphaikhmat jong ka India: Ban kyntiew ïa ka jingïatylli ha ka thaiñ na ka bynta ka bha ka miat jong baroh kawei ka pyrthei.
Ka jingshngaiñ: Ka India ka ïalam ïa ka nongrim jong ka jingshngaiñ. Ka la trei ban wanrah ïa ka aiñ kaba khlaiñ ban ïaleh pyrshah ïa ki kam lehnoh, ki jingjia ïaumsnam bad ki kam beaiñ kiba ïaid palat ïa u pud u sam jong ki ri.
Ka jingpynïasoh: Ka la buh jingmut kyrpang ban kyntiew ïa ka jingpynïasoh. Ka India ka pynlong ïa ka BIMSTEC Energy Centre ha Bengaluru. Ka Centre ka peit ïa ka kam ban wanrah ïa ka jingpynïasoh hapoh BIMSTEC regional grid. Kane ka ïahap bad ka jingthmu jong u Myntri Rangbah duh ‘Kawei ka Pyrthei, Kawei ka Sngi, Kawei ka Grid.’
Ka jingïaineh & jingïada na ki jingjia lynshop ki bor ka mariang: Ka India ka trei ban ïarap ïa ka BIMSTEC ban noh synniang sha ka thong ban pynthikna ïa ka jingïaineh ha ka pyrthei. Ka India ka pynlong man ka por ïa ki jingai jinghikai ban ïada na ki jingjia lynshop ki bor ka mariang hapdeng ki ri kiba long dkhot. Kane ka bynta jong ka jingtreilang jong ka kynhun ka la long kaba kongsan bha namar ka jingma kaba heh ha ka thaiñ ha kaba ïadei bad ki jingjia lynsgop ki bor ka mariang. Ka India ka la pynlong ruh ïa ka BIMSTEC Centre for Weather and Climate ha Noida.
Ka BIMSTEC ha ka jingtreikam- Hapoh ka jingïalam jong ka India ka BIMSTEC ka la ïohi ïa ka jingkiew ha ki kam ban kyntiew ïa ka jingïadei hapdeng ki briew bad ban kyntiew ïa ka jingïatylli ha ki thaiñ. U Myntri Rangbah duh u la buh hakhmat eh ban pynïasoh ïa ki samla, kyntiew ïa ka deiriti bad pynneh pynsah ïa ka mariang. Ïa kine ki bynta la ai jingmut ha ka BIMSTEC. Katto katne na ki kam ba dang shen ki long: BIMSTEC Aquatic championship ha u bnai Rymphang 2024 ha Delhi, BIMSTEC Business Summit ha u bnai Nailar 2024 ha Delhi. Ka jingïashim bynta ka kynhun ba ïadei bad ka kolshor jong ka BIMSTEC ha Bali Jatra ha Cuttack ha u bnai Naiwieng 2024. BIMSTEC Pavilion ha Suraj kund Mela ha u bnai Rymphang 2025. BIMSTEC Youth Summit ha Ahmedabad ha u bnai Rymphang 2025. BIMSTEC Youth led Climate Change Conference ha Delhi ha u bnai Rymphang 2025. La sdang ïa ka BIMSTEC- India Marine Research Network ha u bnai Rymphang 2024. Ka BIMSTEC ha Bangkok: Ka jingbthah jong u Myntri Rangbah duh ïa ka BIMSTEC ha Goa ha u snem 2016 ka dang ïai bteng ban pynsawa bad pynwandur ïa ka jingthmu jong ka kynhun. Ar tylli na ki rai jong ka Goa Retreat la pyllait paidbah ha Bangkok – kawei, ka jingpdiang ïa ka jingthmu jong ka BIMSTEC 2030 bad ka jingpdiang ïa ka kaiphod jong ka kynhun ki riew pawkhmat jong ka BIMSTEC.
