Ka saian bad teknoloji ka la roi sted ha kine ki sngi ba mynta kaba wat haduh ki nongkyndong ruh ki tip lut kaei kaba jia kaei kaba long. Ha kane ka jylla ruh wat ki briew kiba ha kyndong kynshrot ruh ki la tip bad ïohi lut lyngba ka Youtube, ka Whatsapp, ka Facebook kaba jia ha nongbah Shillong lane ha kiwei pat ki bynta jong ka jylla ne jong ka ri India ne wat ha ka pyrthei hi baroh kawei. Ka juk jong ka jingïa ap khubor ha ka sngi kaba bud la ka long lyngba ki kot khubor ne kiwei pat ki lad jingtip ka la kut. Mynta ka la dei ka juk kwah tip noh ne ïoh jingtip noh tang hapdeng khyndiat kynta.
Dei namar kane ka jingtip kaba sted bha imat ba ki la don katto katne ki Seng Saiñpyrthei kiba sdang ban pyndonkam ïa ki teknoloji ne ïa ki social media ha kine ki sngi na ka bynta ka jingïakhun elekshon. Ha ka National Election ha u snem 2019 sha Lok Sabha, ka Seng BJP ka la pyndonkam bha ïa ka teknoloji na ka bynta ka jingïalap elekshon jong ka, bad dei lyngba kane ba ka Seng ka la lah ban pynpoi lut sha ki kyndong kynshrot ïa ki rukom pynphriang ïa ki lad ïalap elekshon jong ka.
Ha jylla Meghalaya ruh la ïohi ha kine ki sngi ba ki la don ki seng Saiñpyrthei kiba la pyndonkam ïa kane ka lad ban ai khubor pyrshah ïa ka jingtreikam ka sorkar Meghalaya Democratic Alliance (MDA). Ym shym la paw mano kane ka Seng kaba pyndonkam, hynrei ka la pyndonkam da ka kyrteng “Modi Meghalaya”. Nangta don ruh kawei ka lad pynsaphriang khubor lynga ka kyrteng “Meghalaya Deserves Better”, kaba ka sei madan ïa ki jingbym lah treikam jong ka sorkar MDA.
Kumba ka kdew ba ka jingroi jong ka saian bad teknoloji ne ka media ka long kaba std haduh katta katta, khlem pep ka jylla kan ïohi ïa ka thma elekshon kaba jur lyngba ki social media da kaba pyndonkam ïa ki teknoloji jong kane ka juk ba mynta.
Ka Meghalaya Pradesh Trinamool Congress, mynta la jan shi bnai ka la sdang ban ïalap paidbah lyngba ki social media da kaba khot bad wer ïa ki paidbah ban wanrah ka jingkylla ha ka elekshon 2023.
Nangta wat ha ki elekshon kiba dang shu dep la don katto katne ki kyrtong kiba la pyndonkam da ki lad pathai lyngba ki social media ban khot ban wer ïa ki paidbah ban kyrshan ïa ki. Nangta ki don kiba la pyndonkam ruh da ki jingrwai bad mynta ym tang ki jingrwai, hynrei la pyndonkam ruh sa da ki video ruh ïa kine ki jingrwai, khnang ban nang pynktik shuh shuh ïa ki paidbah.
Ki dak ki shin ki paw ba ki Party bad ki Kyrtong ha kane ka elekshon 2023 kin pyndonkam bun bha ïa ka teknoloji bad social media na ka bynta ka jingïalap elekshon jong ki. Hynrei ym tip pat haduh katno kane ka jingtreikam jong ki lyngba kane ka jait jingstad jong kane ka juk ba mynta kan lah ban khring ne ban pynkylla ïa ki paidbah nongthep vote. Namar kumba ka paw hi ka jingtreikam ka pisa ha ka elekshon ka long kaba jur bha bad ka sur kaba ïoh sngew ka long beit satang ïa kata ka jingïatheh pisa da ki kyrtong. Ka jingkylli ka long la hato ki paidbah kin peiphang, kin sngewthuh haduh katno ïa ki jingïalap ne ïa ki khubor kiba la pylllait lyngba ki social media ne ka bor jong ka pisa kan tyllep lut ïa kiei kiei baroh kiba wan lyngba ki social media la ka long kiba shisha ne ki bym shisha ruh. Tang ka por ka ban batai ïa kane.