Hadien kumba lai bnai ba la pynlong ïa ka Ïingdorbar Thawaiñ kaba thymmai na ka bynta ka samoi 2023 haduh 2028, khatduh ka ïingdorbar kala ïoh ïa u Nongïalam ka Liang Pyrshah, haba u Speaker u la thung ïa u Bah Ronnie V. Lyngdoh kum u Leader of Opposition.
Ym tang u MLA jong ka Mylliem uba la ïoh ïa kane ka shuki, hynrei uwei pat u MLA ka Congress u Salseng Sangma, u la ïoh ïa ka shuki Opposition Chief Whip.
Kane ka jingïoh ka Congress baroh artylli ki shuki ha ka Liang Pyrshah ka la pynlyngngoh ïa kiba bun, namar ba ha ka Liang Pyrshah don ruh 5 ngut ki MLA kiba kynthup ïa ki Dkhot ba la rim bad rangbah bha jong ka ïingdorbar, kum u Dr. Mukul Sangma bad u Bah Charles Pyngrope, baroh arngut ki MLA ka Trinamool Congress. Ka Liang Pyrshah ka don ruh 4 ngut ki MLA ka Seng Voice of the People Party(VPP), kaba pynlong ïa ka Liang Pyrshah ban don baroh 14 ngut ha ka ïingdorbar kaba don 60 ngut ki dkhot.
Kiba bun ki la pynpaw ka jinglyngngoh namar ba ha kaba nyngkong u Speaker u la ong ba donkam ban don 10 ngut ha ka kynhun ban ïoh Nongïalam Liang Pyrshah. Wat lad ka Congress bad TMC ki don lang 10 ngut ki MLA, hynrei kine ki Party kim shym la thaw kano kano ka kynhun ban ïadon lang ha kajuh ka sem, lait noh tang ba ki don lang ha ka liang pyrshah.
Pynba kynsan kynsam hamar ba dang khluit bha ka mat jong ka Reservation Policy, la thung Nongïalam Liang Pyrshah bad kumjuh ruh ïa u Sabuk Rangbah jong ka Liang Pyrshah.
Kiba bun ki pyrman saiñpyrthei, ki la ong ba kane ka jingïoh shuki artylli ka Congress ki dei ki dak ki shin kiba pyni ïa ka jingnang ïajan hapdeng ka Congress ha Meghalaya bad ka Seng NPP, kaba ïalam ïa ka sorkar ha ka jylla.
Lah ban kdew hangne ruh ba u Nongïalam ka Liang Pyrshah um dei u nongmihkhmat uba la kren shai bha ha kaba ïadei bad ka jingpynbha ïa ka Reservation Policy, hynrei bun u la shu kren kyllaiñ.
Ha kiba bun hi, ki shim ba kane ka jingai shuki ïa u Bah Ronnie bad ïa u Saleng kadei ka buit ka NPP ban ïoh da u Nongïalam Liang Pyrshah uba tlot ne u ban nym nud than ban khyrwit ïa ka Liang Synshar.
Shisha ha ka 19 tarik u Jylliew 2023, kane ka jingïajan hapdeng ka Congress bad ka NPP ka la paw pyrthei syndon, haba ka Congress bad ka NPP ki la ïatreilang ban pynkhyllem ïa ka Executive Committee ba la ïalam da ka UDP naduh u snem 2019. Ka UDP ka la ioh thaw ïa ka EC da ka jingïatreilang bad ka NPP kumba ki la ïatreilang ha ka sorkar MDA I bad ka MDA 2.
Hynrei kaei kaba la ïohi hadien kane ka jingshah pynkhyllem ka EC ba ïalam da ka UDP, kaba pynlyngngoh ka long ba u President jong ka UDP, u Bah Metbah Lyngdoh, u la ai khubor noh hi ha ka por janmiet ba ka jingshah pynkhyllem ka EC ha KHADC kan nym ktah satia ïa ka jingïatreilang ha ka sorkar MDA 2. Hato kane ka lah ban long?, haba kajuh ka Party shiliang ka kti ka pyrshah ïa ka NPP bad shiliang pat ka kyrshan ïa ka NPP.
Nangta kane ka jingïajan hapdeng ka NPP bad ka Congress ym pat lah ban ban batai kan poi shano, namar ha ka sorkar jylla ka don lang ka BJP bad ka Congress kan nym nud ban leit ïatreilang haba don ka BJP. Hynrei ym lah ban len ba ka jingïadei hapdeng kine ki artylli ki Party kan sa ktah hi ha ka sorkar jylla ruh bad kaba sah mynta ka long shu ïa ap beit ïa ka por.
