Ka Ktien U Blei ka ïathuh ïa ngi,ba lai ngut ki riewtad na ri mihngi, ki bud ïa u Khlur uba la pyni dak ïa ka jingkha ïa u Khun Syiem. Ka ktien U Blei kam shym la ïathuh janai, nang kane ka bynta kine ki riewstad ki mih, hynrei la shu ong ki riewstad na Ri Mihngi. Kine ki la bud lynti ïa u Khlur ban leit wad ïa U Khunlung Jisu, tangba ym tip katno sngi katno miet ki poi.
Hynrei ka Ktien U Blei ka ïathuh ïa ngi ba haba kine ki Riewstad, ki la poi ha nongbah Jerusalem, ki la klet noh ïa u Khlur ba lam lynti bad ki la leit rung noh pynban ha ka ïing jong u Syiem Herod.
Ka phalang kumno kane?: Haba ki Riewstad ki la poi ha ka nongbah Jerusalem, ka nongbah kaba khraw, ka nongbah kaba dap da kiei kiei kiba itynnad, kiba phyrnai bad ki ïing ki sem kiba la pushara bad ai rong itynnad bha lehse ha katei ka juk. Ha kaba kum kane ka khyllip mat, la tap noh ïa ki khmat ba kynja mynsiem jong ki bad ki la ïohi bad shah ïalam noh ha ki jingitynnad bad ki rong phong jong ka pyrthei. Ki klet ba don u Khlur ba lam lynti naduh ba ki mih na ka Shnong jong ki.
Kum ki Samla bad kum kiba ngeit, bunsien ngi ruh ha ka jingbud ïa U Jisu kum u Nongialam lynti jong ngi, ngi tang shu ïohi ïa ki jingitynnad kiei kiei jong kane ka pyrthei, ngi klet noh ïa U. Ngi tang shu ïohi ïa ka spah. Ngi tang shu ïohi ïa ka rong phong, ngi klet noh ïa U Trai.
Ka ju long ka rukom ruh ba bun ki Samla na Nongkyndong haba ki kiew ban leit pule ne leit bylla sha Sor, ki tang shu poi ha Sor, haba ki ïohi ïa ka jingitynnad ka Sor, la ka long ha ka riam ka beit, ka ktien ka thylliej, ka rukom im, ngi klet noh teng teng ïalade kum ki Khun jong U Blei. Bad jar ngi rung sha ki thwei ka jingitynnad ka nongbah Shillong ne kiwei pat ki nongbah jong ka ri India bad ngi poi noh sha kiba bun ki jingpynshoi. Hynrei sngewkmen ba U Blei Um shym la iehnoh ïa ki Riewstad na Ri Mihngi bad kim shym la ngop ruh ha ki jingpynshoi jong u Syiem Herod ban wan ïathuh lang ïa u ïa ka jingkha ïa U Jisu Khrist.
Haba ki riewtad ki la mih na ka ïing Syiem u Herod, u Khlur ba lam lynti, u la iai pa ïa ki ban ïalam biang ïa ki ïa ka lynti ba kidei ban ïaid tad haduh ban da poi ha nongrit ha Betlehem. Ki para samla bad ki parabangeit, haba ngim shong ne sahkut sah ha ki rongphong bad ki jingitynnad jong kane ka pyrthei, haba ngim ngop ha kiei kiei kiba itynnad jong ka pyrthei, haba ngim ngop ha ka spah, U Trai U iai ap ïa nga bad phi ban long ka lynti sha U Kpa.Ai ba ka jingrakhe jong ngi ia kane ka Khristmas ka long ba ngin bud ïa U Jisu Khrist uba long U nongïalam lynti ïa nga bad ïa phi ba ngin poi sha U Nongpynim jong ngi U ba ha Bneng.
