Ka jingdon ka Block ha Lumshnong kan pynsuk ïa ki paidbah bad kan wanrah ïa ka roi ka par ha ka thaiñ

Khliehriat, Nohprah 03:U Myntri rangbah ka jylla, u Conrad Sangma, mynta ka sngi u la wan ban plie paidbah ïa ka ophis treikam jong ka C&RD Block ha shnong Lumshnong, elaka Narpuh East Jaiñtia Hills District bad la khmih lynti ba ka jingdon kane ka ophis kan ïarap shibun ïa ki paidbah ka thaiñ bad kan warah ruh ïa ka roi ka par ha ka thaiñ, kane ka Block ka kynthup ruh ïa ki bun tylli ki shnong kiba don ha khappud bad ka ri Bangladesh.
Haba kren ha ka jingïalang, u myntri rangbah, u la kubur ba ka long kaba shisha ba ki briew kiba na ka thaiñ Ratacherra, na Borghat bad ki shnong ba khappud ki la hap ïaid shisha ïa ka lynti kaba jngai ban poi sha Khliehriat ne sha Wapung C&RD Block bad ktah ïa ka bai leit bai wan, u la pynpaw ka jingsngewkmen ba ha kane ka sngi la plie ïa kane ka ophis kaba long ruh ka ophis kaba donkam haduh katta katta ïa ki paidbah bad kumjuh ruh ban wanrah ïa ka roi ka par bad ban kyntiew ïa ka thaiñ hi baroh kawei, u la pynpaw ruh ba kane ka ophis ka dei kaba ki paidbah ki la dawa naduh ki snem kiba mynshwa ha kaba ym shym la lah ban pyn urlong hynrei dei ha kane ka sorkar MDA kaba la lah ban wanrah pat ne lah ban pynurlong ïa kane.
Kum u nongïalam uba ha khlieh jong ka jylla, u la kyntu ïa ki heh sorkar bad kumjuh ruh ïa ki Block Development Officer ba ki dei ban don ka mynsiem ban shakri hok ïa ki paidbah bad ong ruh ba “Lada phi trei bha ïa ka kam, kan wanrah ïa ka jingkmen ha lade bad kumjuh ruh kan wanrah ïa ka khmat phuh samrkhie ha ki paidbah” u la ai ka jingkhublei kitbok kitrwiang ïa u BDO , ïa baroh ki nongtrei bad kumjuh ruh ïa baroh ki paidbah jong ka thaiñ ba kin dang lah ban kiew irat lem bad ka roi ka kiew ha ka thaiñ “Naduh mynta ka sngi, baroh kito ki jingeh kiba phi la ïaid lyngba kin jah lut baroh bad kin nym don shuh bad ka thaiñ Lumshnong bad ka thain hi baroh kawei mynta ka la shim ïa ka shi synjam kaba shakhmat ha ka roi ka kiew bad kumjuh ruh na ka liang jong ngi kum ka sorkar ngin iai don lang don ryngkat bad ki paidbah”
U la ai ka jingkhublei ruh ïa ki nongmihkhmat kiba la ïa don ryngkat lang ha kane ka sngi, ia ki nongialam abd ki dkhot jong ak jaont Action Committee bad ïa ki paidbah ka thaiñ bad ong ruh ba “Don kiba la kylli ïa nga ba balei kane ka sorkar ka thaw bun ki C&RD Block hynrei nga la ong ba kane kam dei satia ka kam ban ialehkai politik bad ka long kaba sngewsih ba lada ngi leh polik ha kino kino ki kam bad nga ngeit ba ki paidbah jong ka thaiñ ruh ki sngewthuh bad ki ngeit mynta ba kane ka dei ka roi ka kiew, ka bha ka miat ïa baroh solonsar” u la ong ruh ba kane ka wanrah ïa ka jingïajan bad ki bor disrict bad kumjuh ruh bad ka sorkar.
Haba kren shaphang ki surok ha ki thaiñ khappud, u myntri rangbah u la ong ba dei tang kane ka sorkar MDA kaba la mih sha khmat ban pyn urlong ïa ka jingdawa ki paidbah ha kaba la lah ban pyllait ïa ka mang tyngka kaba T 120 klur tyngka kaba na ka bynta ban shna ïa ka surok kaba 29.5 kilo mitar ha khappud bad kane kan pyniasonh ïa kiba bun ki shnong ha ki thain khappud bad halor kane la dep ruh ban plie paidbah u u maw nongrim bad shna ïa kane ka surok.
U la ong ruh ba hapoh ka jingialam ka sorkar MDA, wat hapdeng ka jingshah pynwit ha u khniang covid-19 hynrei la lah ban pyndep bun tylli ki surok, bun tylli ki kam kiban wanrah ïa ka roi ka kiew bad mynta la khmih lynti ruh ba yn sa lah ban pyndep shuh shuh sa kiwei kiwei ki kam ki ban kyntiew ïa ka jylla.
“Bun na ngi ngim sngewthuh ïa ka jingtrei shitom ka JAC ha kaba ki nongialam ki hap ban iehnoh shadien ïa ki kam ki jam la jong bad ban pynlut por na ka bynta ka bha ka miat jong ki paidbah bad kane kam dei ka kam kaba suk, nga dang kynmaw ba ngi la don ka jingiakynduh lang ki nongialam ka Narpuh Border Area JAC, lem bad ka kong Santa Mary Shylla kiba la wan ban dawa ïa kane ka C&RD Block, nga ai khublei ïa ka jingshim khia jong ki na ka bynta ban kyntiew ïa ki paidbah jong ka thaiñ” bynrap u Conrad Sangma.
Uwei na ki myntri ka sorkar jylla, u bah Sñiawbhalang Dhar u la ong ba “ka ophis Block ka dei ka ophis kaba donkam tam jong ki paidbah khamtam ha ki jaka nongkyndong bad ki skim ba la wanrah da ka sorkar ki treikam lyngba ki block, kumta ka jingjngai ka ophis ka wanrah ïa ka jingthut bad ka pynthait ruh ïa ki paidbah ban leit sha ki ophis” u la pyntikna ba ïa kane ka ophis kan don ha Lumshnong namar ka sorkar kaba treikam kam ju rah hynrei ka ju ai shuh pynban, u la iaroh ruh ïa ka jingstad u myntri rangbah namar kat shab u leit u lah ban shim ïa ka rai ka ban wanrah ïa ka jing ïa jan bad ki paidbah.
U bah Dhar, u la ai ka jingkhublei kitbok kitrwiang ïa ki nongtrei jong ka C&RD Block Lumshnong bad ïa baroh ki paidbah ka thaiñ ba kin nang lah ban kiew shaphrang ha ki kam ki jam bad kumjuh ruh ha ka ïoh ka kot.
U MLA jong ka Sutnga-Saipung Constituency, u bah Shitlang Pale u la pynkynmaw ba myn ha u snem 2017 la rah ïa ka Block na Khliehriat sha Lumshnong hynrei hadien pat la rah noh sha Wapung bad u pynpaw ka jingsngew kmen ba mynta la lah ban pynurlong ïa kane ka ophis ha Narpuh namar kane ka wanrah ïa ka roi ka par ha ka thaiñ, u la ai ka jingkhublei ïa u myntri rangbah halor kane.
U MDC ka thaiñ, uba dei ruh u nongkitkam jong ka Narpuh Border Area JAC, u bah Emlangki Lamare, u la ai ka jingkhublei ïa u Conrad Sangma uba la pyn urlong ïa kane ka Block ha Lumshnong bad u la ai khublei ruh ïa u Secretary ka JAC, u bah Daiapherbha Lamare uba la shim khia ban bud dien ïa kane ka kam
U Deputy Commissioner ka East Jaiñtia Hills District, u Abhilash Banarwal, IAS, u la pynpaw ka jingsngew kmen bad ong ruh ba hapdeng ka jingrakhe ïa ka jingdap 75 snem ka ri na ka jingioh jinglaitluid ka ri India bad hapdeng ka jingrakhe ïa ka jingdap 50 snem ka jingioh jylla ba pura ka Meghalaya, la ioh ruh ban plie ïa kane ka ophis C&RD Block ha Lumshnong, u la pyn shlur ïa ki paidbah ba kin wan sha khmat ban wad ki skim bapher bapher na kane ka sorkar ka ban long ka jingmyntoi ïa ki paidbah.
Kiba la ïa don ryngkat ha kane ka sngi ki kynthup ruh, i kong Santa Mary Shylla, i ban sa iakhun ïa kane ka election na Sutnga Saipung Constituency, u Waheh Shnong Lumshnong, u bah Monlang Ladong, ki nongialam bad ki dkhot ka Narpuh Border Area JAC, ki paidbah ka thaiñ Narpuh, ki Block Development Officer bad kiwei kiwei ki heh sorkar jong ka district.