Ka jingbuh ïa ki People’s College sha baroh ki district kan ïarap pynrung klas ïa ki samla pule: Rakkam

Shillong, Naitung 05: U Myntri ka tnat Pule Puthi ka sorkar jylla u Rakkam A Sangma u la ong ba ka jingmang ban buh ïa ki 21 tylli ki People’s Colleges ha kylleng ka jylla kan ïarap ban pynduna ïa ka jingkitkhia ha ka kam pynrung klas ha ki jaka pule kiba don ha nongbah Shillong.
Katkum ka jingong jong u Sangma, ki People’s College ki la saphriang ha baroh ki district jong ka jylla ha kaba kane ka la pynphriang ïa ka pule sha kiwei ki jaka bad ym tang ba ka Shillong kan long pdeng ha kaba ïadei bad ka higher education bad kan pynduna ïa ka jingkhia halor ki kam pynrung klas ha ki college ha Shillong.
U Myntri u la pynpaw ruh ka jingïaroh halor ki jingjop ha ka pule puthi kaba long ruh hapoh ka jingïalam ba shemphang jong u Myntri Rangbah ka jylla u Conrad Sangma.
Haba kylli la ka sorkar ka pyrkhat ne em ban pynbun ïa ki jingdon ki People’s College, u Sangma u la ong ba ki la don bun ki jingtyrwa ba la ïohpdiang hynrei kam pat shym la don ka rai halor kane ka bynta.
U Sangma u la banjur ba ha kajuh ka por haba pynïar ïa ka higher education kaba long kaba kongsan, ka jingbha ka pule puthi ym dei satia ban ïapeiñ. Ka sorkar ka dang trei ïa ka kam halor kane ka bynta bad na ka liang jong u, u la pynthikna ba kino kino ki college ba pynmih thymmai ki dei ban ïaid katkum ki kyndon ka pule puthi.