K at nangmih ki sngi, la i kumba ki jaka khamtam lei ki jaka sor ki la nang khapngiah. Ka jingbun briew ne ka jingroi jong ki nongshong shnong ka dei kaba ym lah ban lait la ka long ha kano kano ka shnong ne kano kano ka ri ruh. Hynrei ka jingdon ïa ka aiñ kaba khlaiñ bad ïa ki nongsynshar kiba ïohi jngai ka pynlong ïa ka nongbah ban long kaba ïaid beit ïaid ryntih. Katba hangne ha ka nongbah Shillong pat haba shu peit la i kum ka nongbah ne ka sor kaba ym don satia ki nongsynshar. Ki lynti paidbah bad ki jaka ïew ki la jyllei da ki nongdie jingdie bad la shu ïa tur bad phriang katba mon haduh ba la khapngiah lut ka lynti ka synkieng ruh da ki nongdie madan bad ki nongkhaïi beaiñ bad dkhar bad khasi. Naduh na ïewduh haduh Khyndai lad bad wat kiwei ki dong ruh katei ka jingïatur bad knieh wat ïa ki jaka ïaid paidbah ruh ka la jyllei bha ha kine ki sngi katba nangmih na uwei u snem sha uwei u u snem. Ym lah pat ban len ba kawei na ki daw ka dei namar ba ban palat ka jingduk jingkyrduh sha ki thaiñ nongkyndong ba ki briew kim banse ban ïatuid sha sor ban ïa wad bylla katba ïoh ne ban shu die wai dong ne die ino ino i jingdie tangban ïoh bam kyndoi jakpoh. Ha nongkyndong kiba pli kiba shaniah ha ka kam bylla bunsien kim ju ïoh bylla man la ka sngi khamtam ha ka por tlang lei lei ki mad bha ïa ki jingeh na kata ka daw ïa tuid lut sha ki jaka sor tang ban ïoh bam kyndoi jakpoh.
Ka ïewduh kadei kawei na ki jaka kaba khapngiah tam bad ka daw kam dei ei namar ba la bun ki briew nongleit siew, hynrei ka daw kaba kongsan ka dei namar ba ki bor kiba peit bad synshar ïa ka ïewduh kim lah ban teh lakam ïa ki paidbah nongkhaïi ba ki die ïa ki mar tang hapoh ki dukan ne ki basa kiba la ai sha ki. Hynrei wat ïa ki lynti ïaid ruh la phiah ha ki ar bynta bad la buh jaka die madan noh hapdeng. Kane kam dei eh ka jingisynei ïa kiba duk kiba ratoi hynrei kawei na ka daw hi ka dei ka jingkangar pisa jong ki bor kiba dei peit ïa ka jingïaid beit ïaid ryntih jong ka ïew. Hooid baroh ngi sngewsynei ia kiba duk ba ratoi ba kin ïoh ban kamai jakpoh, hynrei ym lah pat ban ïapein ïa ka jingkylluid bad ka jingïaid beit ïaid ryntih jong ka rukom synshar khadar. Mynta lada jia ba khynñiuh jumai ha ka por mynsngi mynshai tang na ka jingïajuh para briew namar ba khapngiah palat ha ïewduh bad Khyndai Lad ruh da ki phew ne spah ki mynsiem briew ki ban duh ei ïa la ka jingim.
Ka Shillong kaba la ïoh ïa ka nam kum ka Scotland jong ka ri Mihngi na ka por sha ka por ka la nanglip rong lip rong katba nangmih ki sngi bad lah ban ong ba mynta lei lei ka la dei pynban kawei na ki jaka kaba lymmuh tam ha kine ki sngi ha ka liang ki ïew ki hat. Ha kine ki sngi ka la long kaba thait bha ban rung shapoh jong ka ïewduh namar ba la pynwit palat ïa ki lynti ïaid baroh da ki nongdie madan bad ka ïew ka la shu khap ngiah bad kam long shuh ka ïew kaba khuid kaba suba . Nalor jong ka jingpynwit jong ki nongdie madan ha ki lynti ïew wat kito kiba don la ka jong ka basa ruh ki ïaleh katba lah ban phriang ïa ki mar jong ki palat ïa u pud u sam jong ka dukan ne ka basa jong ki. Kane ka la nang pynkhap ngiah shuh shuh ïa ka ïew kaba la bna nam jong ka ri Khasi.
Baroh ki lynti ïaid jong ka ïewduh kiba la kham heh kim lait shuh na kane ka jingtur jong ki nongdie madan bad ruh ki nongdie dukan ba phriang ïa ki mar jong ki shabar la ka basa. Ka bor jong ka pisa shisha la la pynduh lut ïa baroh ki jingbit jingbiang jong ki paidbah bad ruh ka jingdon ïa ka ïew kaba khuid bad kaba itynnad jong kane ka ri Khasi.
Ym tang ka ïewduh hynrei wat ki rud surok jong ka surok naduh Motphran shaduh Khyndailad ki la kylla long ki jaka die madan. Ha kine ki sngi ka Motphran ka la long kawei na ki madan ïew luri lura bad ym don aiñ shuh ka ban teh lakam ïa ka jingïaid beit ïaid ryntih. Baroh ki la ïatur beit ban die ïa la ki jong ki mar kiba pher bapher ha Motphran. Ki rud jong ka surok naduh rum Motphran ter ter sha Bimola, shaduh them Bijoi ki dap da ki poi ei kiba la pynwit ïa ka surok bad pynthut ïa ka leit ka wan jong ki paidbah. Bunsien ki paidbah ki hap ban ïaid lang bad ki kali ha surok namar ba ki surok bad lynti ïaid kjat la klun lut da ki khar die madan.
Ka jingailad na ka liang jong ki bor ba dei peit ïa ka bha ka miat jong ka sor ka la pynshlur shibun eh ïa ki briew na ki thaiñ nongkyndong ban wan buhai shnong shapoh sor bad im la ka im kyndoi jakpoh da ki kam khaïi bad die madan. Hynrei kawei kaba i shyrkhei ka long ba kiba bun kiwei pat ki shim kabu bad katba nang bun ki briew kiba lyngkar ka imlang sahlang ka kylla long lyngkar bad shibun ki kam sniew ki lah ban jia. Ka jingbymlah jong ki riew lyngkar ban roi ha ka kamai ka jih ka wanrah shibun ki jingïalam bakla ïa ka jingim jong ki hi. Kumta ka la donkam ïa ki bor synshar district ban peitngor bad tehlakam khnang ban lait na ki jingsniew ba harrukom khamtam na u drok uba la jyllei palat ha kane ka nongbah.
