Ka jingai tika kam dei ban pynthut ïa ka jingïoh Birth Certficate ki khunlung ba aplai Aadhar: Health Department

Shillong, Lber 20 : Ka sorkar jylla ha ka sngi Palei ka la pynmih ïa ka hukum ba la pynsangeh shwa ïa ka jingdonkam ban da hap ai tika na ka bynta ban ïoh ïa ka Certificate na bynta ki khunlung ba kin lah ban pynrung kyrteng ha u Aadhar na ka bynta ban ïoh ïa ki jingmyntoi kiba bun lyngba ka Integrated Child Development Services (ICDS) kaba ju ai sha ki khunlung ba dang shu kha.
Katkum ka jingpyntip ba la pyllait da ka ophis u Commissioner & Secretary ka tnad ka Koit ka Khiah ka jylla, u Dr. Joram Beda la ong ba baroh ki tnad treikam jong ka Registrar of Birth and Death kiba don ha ki distrik bapher bapher ba kin ai ïa ki Syrnod Sngikha lane ki Birth Certificate sha baroh kiba aplai khlem da donkam peit ïa ka rukom ai tika jong ki khunlung.
Shuh shuh la ong ruh ba ïa ka jingai tika lah ban buh rekod noh la ka jong bad shim noh ïa ka kum ka jingai tika kaba ju leh barabor hynrei kam dei satia pat ban don jingïadei bad ka jingai ïa ki syrnod sngikha.
La bthah ruh ba ïa ki heh ka tnad ka Koit ka Khiah bad ICDS ba kin bteng ïa ka jingai jingpynshai halor ka jingai tika bad ruh ban pyntikna baroh ki khunlung khynnah kin ïoh ïa ka tika ha ka por kaba biang.
Halor kane, la ong ruh ba ka jingbuddien halor kane ka rukom treikam yn sa bishar biang hadien ba la kut kine ki ar bnai ban peit ïa ka jinglah treikam bad la ka dang i donkam neem ban bteng ne pynbha shuh shuh, ong katei ka jingpynbna.
Ïa kane ka rai la shim hadien ba la pyntip sha ka sorkar jylla ba ka jingdonkam ban ïoh shwa ïa ka tika kum ka jingbuh kyndon ban ïoh ïa ka syrnod sngikhka ka la buh jingeh bad pynslem ha kaban pynrung kyrteng ïa ki khunlung ba dang kha.
Kumta, la ong ba kane ka jingslem, ka la ktah kylla pat ïa ki kmie ki kpa ban shem jingeh ban ïoh pynïasoh Aadhar na ka bynta ki khunlung ba dangkha ha kapor kaba biang, kaba ha kawei pat ka liang ka la ktah na ka bynta ban ïoh ïa kiba bun ki jingmyntoi ba wan na ka sorkar jylla khamtam eh lyngba ka Integrated Child Development Services (ICDS).
Ban ïoh ïa kine ki jingmyntoi baroh, ka Aadhar card kadei kaba kongsan tam ban ïoh ïa kine ki jingmyntoi kynthup ïa ki jingbam ba tei na ka ICDS, nangta ka jingsumar, bad ki jinghikai ïa ki khunlung ba dang rit. Kumta la ong ruh ba ka jingpynslem ban ai ïa ki syrnod ka lah ban knieh noh ïa ka hok jong ki khunlung khynnah ïa kaei kaba ki dei ban ïoh.
Katkum kane ka jingpynbna, la ong ruh ba ka sorkar ka don ïa ka thong ban pynrung Aadhar ïa baroh ki khunlung khnang ba kin ïoh pura ïa ki skim kiba dei na ka bynta ka jingmyntoi jong ki.