Sa tang Shibnai 11 sngi, ka lyer Election ban jied nongmihkhmat sha ki artylli ki District ka la sdang ban beh kyrthep ha kaba ki party ki la sdang ban sei bad pynshong nongrim ïa la ki nia ki jutang ban khring ïa ki nongthep vote ka ban long ha ka 21.02.2025.
Wat la ha kane ka samoi treikam jong ki District Council ki la ïoh ïa ka jingpynjlan ei sa shisnem tam nalor ka por ba la buh, pynban ka jinglong jingman ha ka synshar khadar kam da long satia kaba itynnad bad kaba hun namar ha baroh ar ki district council la pynthohbria ïa ka da ka jingïapynkhyllem sorkar shiphang da kawei shiphang da kawei ka Executive Committee. Balei ka jia kumne, ka daw ka long ba bun palat ki riewkhwan myntoi (aya ram gayaa ram) bad ka jingbym don ka Aiñ ban khanglad ïa ka jingkyntiap seng (anti defection law) kumba don ha ki state assembly, ka ktah shibun. Ka jingnang hiar kyrdan ka synshar khadar jong ki Council ka long hadien ba kim lah shuh ban bat halade ban pynïaid ïa ki Lower Primary School, naduh nangta ka sdang hiar ka burom jong ka. U Nongthoh u kynmaw katno ka jingishongshit jong ki nonghikai Primary ha ki por sdangbnai ba ki ñiom sha District Council ban leit draw ïa ki tulop jong ki, ka i im shisha kata ka dur ka dar jong ka Council.
Kaba lyngngoh ka long ba ki CEM ki wan bad ki leit hynrei ym don uwei ruh uba shimkhia ban pynlong aiñ ban khanglad kyntiap seng, lehse ki pyrkhat ba kan ktah ïa ka interest jong ki shimet ruh, ym lah ban tip. Ki beh Delhi man ka por ban ïoh amendment ïa ka Sixth Schedule hynrei ym don riewshlur ban buddien ïa katei ka kam kaba ktah mat-ïong ïa ka Council hi.
To ngin ïapeit khyndiat hadien ba ki party ki la dep pynbna bad yn sa pynbna ïa ki kyrtong jong ki, ka ïew election ka la sdang ban thnam bad ki dukan sha ha ki ïew ki hat ruh ki la kham thnem, namar ka khana election ka kham thnam bha ha ki dukan sha, ha ïing ïapbriew bad ha ïing ïathoh ban ha lympung.
To ngin phai sha ki party kumno ki long:
NPP : Wat la ka la ïoh ban bat ïa u Lakam synshar ha baroh artylli ki District Council, ka Progress Report jong ka JHADC te kam da long than kaba ai jinghun namar kumba ngi tip, wat tang ka tulop ki nongtrei jong ka ruh kam lah ban siew da ki bun tylli ki bnai. Lada ngi phai sha u pud u sam, ka Karbi Anglong Council (KAC) ka don ka bor ban kyntur sha Block-I jong ka West Jaintia Hills District, ka JHADC pat ka kynrandien, dei namarkata ka daw, ki briew jong ka Mujem, Deiñler, Khatkasla, Lapangap, Khaiñduli, Tahpat, Mookalangi, Labang-Nongpyllut, Mukroh, Saba bad kiwei ki lyniar kthang namar ka jingshah pyndit ba laiphewjait ha ki pulit bad forest guard jong ka Assam bad lehnoh Karbi. Nangta, ka rukom pynmih khajna ka la nangstait nangsdot katba nangmih ki sngi. Ha ka por jong u Ma Edwinson Bareh Ex-CEM jong ka JHADC u ïathuh ba ki la sdang ban kynshew peisa da ki Klur tyngka kum ka Reserved Fund jong ka Council pynban tang ar term hadien ba u la iehnoh, la wan sa ki riew bam ei suda, khlieng bad pynthylli syndon ïa katei ka Fund kum ka Hot nongtymmen ki kmie kpa jong ki.
Ka daw jong ka jinglyngkrang ka JHADC ka dei namar ba la shu thung briew pathar khlem ki sanctioned posts, te yn ïoh peisa na ei heit ban siew, la hap ban shu khrong lada don ba ai synei. Haba peit pat sha ki MDC ba don sha la liang Synshar i kumba kim don jingpyrwa ei ei. Lada ki pyndonkam hok ïa la peisa tang ka revenue bad royalty na ki kharkhana bad marpohkhyndew ruh la biang bha ban pyntyllun ia ki shaka jong ka.
Related Posts
Ka Ïawmusiang kawei na ki ïew ba pawnam bha ha ka Jylla, ka ringsdot ringswai namar da ki phewsnem la pynïeng païa ban shna Super Market hynrei na ki daw jong ka jingbamklop ka la shu sah khongreng haduh mynta. Dei tad ynda la riew ka samoi election ngi ïohsngew ba uwei na ki Deputy CM u la buh mawnongrim ban tei biang ïa ka, lada ki kyndit bynriew naduh ba sdang kane ka samoi ba la ïoh extension (grace period) sa shisnem tam te ka la la dei ban phyrnai khrek katta. Hynrei peit sha Ïawthymmé ruh ka juh, sha Ïawrim ruh ka juh, dangphuh pynban ka ïew Nongpoh, Mawngap, Mairang bad kiwei. Kumta, ka progress report jong ka JHADC ka long kaba noh mynsiem haduh katta katta ïa ki paidbah jong ka Jaintia Hills. Ka NPP ka la failed ha kane ka bynta, wat la ki bat Double Engine kumba kop u Bah Prestone Tynsong ruh.
Haba ngi phai pat sha ka KHADC, hangne ka UDP bad NPP bad Congress ki hap ban kitkhlieh mar katjuh namar para ba ïa ïoh ban shongkhet. Ka jingsniew hangne ka long ka jingkyntiap sem shiphang shane shiphang shatai (kum ka lymbit), ki shu kylla tang ki rong uniform. Ka jingïapher khyndiat ha ka progress report ka long, ba u Lat ka Jylla u la kubur ïa ki katto katne tylli ki Bill ba ki la phah sha u, kynthup ïa ka Khasi Custom and Lineage Bill, KHAD (Regulation and Administration of Land), Regulation of Trading by Non Tribal Amendment Rules, 2023 nalor kiwei pat.
Hynrei ka issue ban ai special status ïa ki Rangbahshnong bad Direct Funding sha ki Council kam pat poi shaei shaei ruh. Ka NPP ha KHADC ruh ka pulom ban pynbeit ïa ki Hima kiba mih
kynrum kynram na ki Syiem bad ki Myntri jong ki, lehse kaba long kawei na ki daw ba ka Assam ka shim kabu ha khappud. Hangne ruh ka Double Engine ka la pulom. Ka Audit and Comptroller Report ba dangshen, ka dang jyrwait shkor ïa ka KHADC halor ka rukom thungkam ïa ki 82 ngut ki staff jong ka khlem da bud ïa ki kyndon treikam.
Ka UDP : Kane ruh wat la ka pyrshang ban trei hapoh ka Jingïalam jong u Bah Teiñwell Dkhar bad Bah Titosstarwell Chyne pynban kim lah ban poi sha ka thong. Hooid, ka UDP ka dei ka party synrop ba kongsan jong ka NPP ha ka sorkar Jylla, pynban ka UDP ka shah pynkhyllem shuki ha ka paralok. Kaba kham sngewsangsot ka long tang hadien shisngi arsngi ba u Bah Titos u ïalam ïa ka kynhun ki EM jong u sha Tripura ryngkat bad ka jingïakren ba ai jingithuh ba kyrpang ïa ki Khasi bashong basah hangtei lyngba ka Tripura Tribal Areas Autonomous District Council (TTAADC), pynban la kyntiap sem noh ki katto katne ngut ki EM jong u kat haduh ban da khyllem syndon khram. Ka progress report ka long ba ka jingïatreilang bad ka NPP ha ka jylla ka pynthohbria noh ïa ka nam jong ka seng rilum jong kane ka party namar ba ki hap ban kren beit ïa ka sur (chord) jong u Conrad.
Nangta, ka HSPDP ruh kumjuh, la pynthohbria ïa ka dur jong ka da ka jingleit synrop kyrkieh jong arngut ki MLA jong ka sha ka NPP tang mar syndep ka Election MLA 2023. Te haei shuh ka nongrim jong u Bah Hopingstone Lyngdoh uba seng ïa ka ? .
Khatduh, sha ka VPP : Hooid, kane ka seng ka dei kaba dang shu shylluid shen hynrei kaba la lah pat ban pynsngew ïa ka jingdon jong ka da ka jingjop jong ki 4ngut ki MLA bad ka jingjopkput jong u MP jong ka ha kane ka election Lok Sabha ba dang shu dep. Hynrei, la sdang ïohi ïa ki dak orpait hadien ba ka la jynthut ïa ki mawkyndon jong ka North Shillong Constituency lyngba ka jingjied kyrtong MDC bad bud sa ka jingshahsloit noh u kyrtong MDC ba ka la dep pynbna officially na Nongstoiñ. Ki paidbah kim lah ban shu khapbripkhmat ïa kine ki jingjia kiba long kum ki dak sdangpei ha ka party. Pynksan katno katno ruh, haba la paw pyrthei, te eh bha ban tep eitmiaw. Sa tang kawei ka kabu ksiar ïa kane ka party ka long, ba ka ïeng ban jynrat ïa ka bor peisa ban pynbieit election. Kane ka long kaba dei ban ai jingïaroh, namar u thied jong ka jingbamkruiñ ha ki Council, jaidbynriew bad ha sorkar Jylla dei ka jingthong peisa ïa ki voters ha ka por election. Uba jop u hap ban buria shwa ïa kaei kaba u la shim ram ban thong ïa ki voters jong u, shisien ba la sdang ban buria..ka ïaid shait shait ka jingbam sap, namar ki riewstad ki ong , shisien ba la sdang ban bamsap ym don jingkut shuh.
Ka jingkylli kaba mih ïa ka VPP ka long, lada ka ïoh shisha ban thaw sorkar rit (EC) ha ki Council, hato ka lah ne em ban tehlakam ïa ki MDC jong ka ha ka kam peisa-tyngka, ynda ki la ïohi pleng “kane ka Tyngka” ha Yarong ka Council, bad ka VPP ka lah ne em ban tehsong ïa ki MDC na kaba kyntiap shawei patï. Kan dei ka acid test ne ka jingtynjuh bakhraw ïa ka longrynïeng jong ka party kaba la khlei ban rat dyngkhong ïa ka ‘bamsap’. Dei hangta yn sa ithuh ïa ka dur ba shisha jong ki nongmihkhmat jong ka lyngba kane ka semi-final kumba ki ong. Ki paidbah ruh kim dei ban kmen pashait ïa ka peisa ïoh-ei namar kan kyrtoh kylla ïa ka lawei ki khun ki ksiew jong ki hi.