Ka Jylla Meghalaya kan sa rakhe ïa ka jingdap 53 snem ïa ka jingïoh Jylla ba pura jong ka. Kum ka jingpynkynmaw, ka Meghalaya ka la ïoh ïa la ka jong ka jylla ha ka Kyllalyngkot 21, 1972 hadien ka jingïakhun kaba jwat bha ban ïoh la ka jong ka state. La thaw ïa ka da kaba ohdur na ka United Khasi Jaiñtia Hills bad Garo Hills Autonomous District Council na ka jylla Assam hi.
Kumno la pynlong ïa ka? Katkum ka Assam Reorganisation (Meghalaya) Act 1969, la thaw na ki Autonomous State hapoh Assam. Kumjuh na ka North Eastern Areas (Reorganisation) Act 1971, dei lyngba jong kane ka aiñ ba la ai jylla pura ïa ka Meghalaya. Hynrei hashwa ïa kata, ka don ka jingïakhih paidbah ba la tip kum ka Hill State Movement ba la lamkhmat da u Capt. Williamson A Sangma, Bah Brington Buhai Lyngdoh, Bah Hopingstone Lyngdoh, Ma Edwinson Bareh, Ma Humphrey Hadem nalor kiwei pat ki riew rangbah.
La pynlong ïa ka jingïakhih paidbah namar ba ka Jylla Assam ka la pynmih ïa ka hukum ba dei ban pynlong Official Language ïa ka ktien Assamese ha baroh ki jaka ba shong ki paid riewlum kynthup ïa kane ka jylla ha ka snem 1960. Ki riewlum ki sheptieng ïoh kin duh noh ïa ka long tynrai jong ki naduh ka ktien ka thylliej, ka dustur ka riti bad rukom-im rukom-man.
Dei halor kane ka nongrim watla ka long ka jingïakhih kaba jai jai hynrei ka la lah pat ban pynktha khlieh ïa ka Sorkar Assam kat haduh ba ka Indira Gandhi Prime Minister kam lah shuh ban shu sngap mynthi khlem da pynurlong ïa ka jingdawa jong ki riewlum kiba don ha kane ka jylla. U Ma Edwinson Bareh u ïathuh ha une u nongthoh shiphew snem shwa ba un khlad noh, kumno ba ka Mrs. Indira Gandhi ka la summon ïa ki katto katne ngut ki nongïalam kynthup ïa u bad u Capt Sangma sha Delhi ban ïatai sani halor ka dur ka dar jong kata ka jylla ba thymmai.
Hadien katei ka jingïathir kaba sani, ka Prime Minister Indira Gandhi ka la mynjur ban ai jylla pura ïa ka Meghalaya kum ka jylla ba 22nd ha India. Ka official language jong ka, ka long da ka English, hynrei ka ktien tynrai te dei hi ka Khasi, Jaiñtia bad Garo, katba ïa ka kyrteng jong ka pat la shim kylliang na ka ‘Thup jingwad bniah’ jong u Professor Shiba Prasad Chatterjee, Geography Department ka Calcutta University ha ka snem 1936, kaba mut ka jylla ‘ba shong ki Lyoh’. Nalor kiwei pat ki bynta ba ïar jong ka jingsynshar ka sorkar Bilat (British Rule), ki Tribal Area jong ka North-East ki dei ki bynta baheh jong ka Eastern Bengal bad Assam Administrative Divisions.
Sanphew lai tylli ki snem, lada dei ha ka rta jong u briew te ka la dei ban long rangbah pura naduh ka nongrim, ka ïoh ka kot bad ka roi ka par, hynrei haba shim kyllum, bun ki nongshong shnong ki dang sahdien. Wat ka rukom-rep rukom-riang ruh dang bun kiba bud ïa ka rukom rep hyndai, ka rukom rep da ka jingstad saïan ka dei tang ha ka jingmutdur jong ki nongkyndong. Ki trei durut da ka bor met bor phad bad da ki masilur, namar kita ki tractor bad kiwei pat ki agricultural technology ki long tang ha jingphohsniew. Shi bynta, dei ruh na katei ka daw ba ka jylla ka kynran dien ha ka ïoh ka kot namar ka rep ka riang ka dei u budlum jong ka Jylla. Nalor nangta, lada ki la pynmih eh ïa u mar-rep jong ki, pynban ki shem shitom ban pynïaid ïew khamtam ha ka por lyiur, namar ba ki lynti synkien bad ki surok (Road Communications) kim pat biang satia. Don bun ki shnong kiba hap ban bah ne kit “khoh khara- lyndet” ïa kiba pang ba shitom ban pynpoi sha ki jaka sumar, te kumno yn mutdur ban pynpoi lei kat ïa u mar rep sha ïew sha hat?
Haba phai pat sha kawei ka liang, ngi shait ïohsngew man ka snem ba rakhe ïa ka ‘Meghalaya Day’ ki shait pynbna ruh ïa ka kyrteng jong ki nongïoh Meghalaya Award kata; Tirot Sing Award for Arts and Literature, Pa Togan N Sangma Award for Social Service & U Kiang Nangbah Award for Sports & Games. Ka jingkylli ka long, balei hap ban buh dorkhas (apply) ban ïoh ïa kitei ki Award?
Ngi im ha ka 21st Century ha kaba ka lad jingtip ka par stet haduh katta katta, nalor nangta, ka sorkar ka don ka tnat syntiat (Intelligence) kaba khlaiñ. Hato, kita ki tnat kim lah seh ban pathai khubor sha ka sorkar ïa ki briew kiba dei hok ban ïoh ïa kitei ki Award khlem apply? Lada leh kumta, ka jingjied kan long kaba shongnia bad ka bakhuid shisha, hynrei lada apply hi, u bym dei hok ban ïoh ruh lada u khlaiñ ban lobby (ban kyllan khleiñ) ïa ki politician bad kiba don ha ka bor, te ïoh beit; kaba mut ka backdoor entry kam don shuh. Balei hap ban lobby, shu buh ïa kawei ka Award la apply da ki phew ngut, te hap ban leit ïakren sop sop na lyndet pyrda ban ïoh. Kumta, ban lait na kitei ki kam bym shongnia, ka sorkar Meghalaya ka la dei ban thung da kawei ka kynja committee, lehse ‘Meghalaya Award Selection Committee’ kaba kynthup ïa ki heh na DIPR, Arts and Culture, Intelligence Branch, uwei ar na ki Rangbah shnong bad uwei ar na ki Press Fraternity. Kata ka Committee kan bishar bniah la kumno kumno lai bnai shwa ka Meghalaya Day.
Ha kawei pat ka liang, ka jingmynjur jong ka Cabinet dangshen ban tynsat ïa ka kyntien Pnar ha ka jingrwai State Anthem ka long kaba dei ban ai jingïaroh. Ka daw ka long ba Khasi, Pnar bad Garo ki dei ki lai tylli ki major tribe. Ka jingkren pynksan jong u Bah Paul Lyngdoh Myntri Sorkar ha ka sien pynmih ïa kane ka Anthem ba ym donkam ban buh ktien Pnar, namar la don ka ktien Khasi. Katei ka jingkren, ym tang ba ka pynmong ïa ka mynsiem jong ki briew ha Jaiñtia Hills hynrei ka pynlong nongwei ruh ïa ka jingsngew jong ki ha ka Jylla. Kum kine kiei kiei dei ban da pyrkhat sani bha, namar u paidbah u kham stad ha kane ka juk, namar ka ktien ki riewstad ka ong ‘You cannot be right all the time” (phim lah ban dei lut manla ka por).
Haba phai pat sha u pud u sam, 53 tylli ki snem, ka jylla Meghalaya kam pat lah ban ïoh ïa la ki jong ki pud sawdong ba thikna. Ki briew ba im ha khappud ki im kordit, sha bneng ruh ym kot sha khyndew ruh ym tyngkhuh (catch 22 position). Ka daw ba kongsan ka long ba ki nongïakhih Hill State ki kmen palat ban la ïoh jylla, ki klet pat jlang ïa u pud u sam. Kumta, ka sorkar Assam ka ïoh kabu ban tuklar katba ka mon. Block I, Block II ki dei tang ki syrngiew jong ka Meghalaya. Haba ka Assam ka pyrshang ban kyntur sha Nagaland, u Naga u ther naphang ha Merapani haduh ba ka Assam ka hap ban kynran dien, kumjuh ka pyrshang ban tur sha Mizoram ha Hailakandi-Kolasib, u Mizo u ther puk kat haduh ba ka Assam ka hap ban kynran. Imat, ka Assam ka shem ba dei tang ki nongïalam ha Meghalaya kiba jemnud ba ka lah ban kyntur katba ka mon. Lehse, ha kaba sdang, ka daw ka long ba ka Meghalaya ka leh khun-swara ïa ki briew kiba shong ha khappud, ban seng skul sorkar bad pynpoi ding ilektrik bad surok sha kitei ki khappud te bha ba ynnai. Dei namar kata ka daw, ba ka Assam ka shim kabu da kitei ki jait development ban kam trai syndon namarba ka la pynpoi surok bad kumta ter ter kat haduh ba ka nud ban hukum ban phah shondur Epic bad Adhaar Card na jylla jong ka ïa ki briew ha katei ka thaiñ kumba ka leh sha Psiar, Moojem, Deiñler, Khatkasla, Phlephle, Labang Nongphyllut, Lapangap bad kumta ter ter.
Ki nongïalam ka sorkar MDA ki dei ban long aggressive (ban nud) ban ïa pyni bor hateng hateng ym dei ban shah jem, namar haba kiwei ki jylla ba marjan kim ailad, ka Assam ka shim kabu na ka Meghalaya kaba shahjem. 53 tylli ki snem, to ngin pyrkhat haei ngi la poi ne ngi la poi hajuh?
