Ka jingïakhun ban ïoh pynkynriah noh ïa ki briew kiba sah ha them-metor sha kawei pat ka jaka kadei ka ishu kaba la slem bha kaba naduh ki sorkar kiba mynshwa ki la pyrshang ban ktah hynrei kam shym la poi shaei shaei ruh. Ki don bun ki daw kiba khanglad ne kiba long ki diengpynkiang halor katei ka sien pyrshang.
Hynrei dei tad ha kane ka sorkar Meghalaya Democratic Alliance ba ïalam da ka NPP kaba la pynlong ïa katei ka jingïakhun ban pynkynriah ïa ki ba kan sdang paw kam. Ka daw kaba pynlong ïa kane ka sorkar synrop ban sdang wad lad wad lynti ruh kadei hadien ba mih ka kynrum kynram kaba jur bha kaba la ktah wat ïa ka shongsuk shongsaiñ ha ka jylla baroh kawei. Watla ka sorkar ka la shim por ban pynbeit hynrei la ïohi pat ba ka jingpyrshang ka la sdang ban paw dak bad ïohi ruh ba ka jingïakren ka la sdang ban poi ha ka lynti kaba dei.
Kane kadei ruh ka por ba naduh ki nongshong shnong ka jylla haduh ki seng sainpyrthei, ki kynhun bapher bapher bad ruh ïa kito kiba sah ha katei ka jaka ban ai ka jingïatrei lang bad ka sorkar khnang ba ka jingthmu ban pynkynriah noh ïa ki na katei ka jaka kan long kaba seisoh bad kan dep noh kham kloi.
Watla dang shen la ïohi ba kitei ki briew kiba sah hangtei lyngba ka Harijan Panchayat Committee ki la dawa ba dei ban ai mar 200 square meter ka jaka bad ruh ka bai shna iing, hynrei ban shim ïa katei ka rai ka shong mynta ha ka jingstad bad ka jingshemphang jong ka sorkar kumno ban leh. Ka shong ruh ha ka jingïa mynjur bad ka jingïapynbeit lang kaba kumno ka jaka sah lane ka jaka ba ka sorkar kan ai sha ki.
Kumba la pynpaw da u Symbud Myntri Rangbah ka Jylla, kam dei satia ka kam kaba suk ban pynhun ïa ka jingdawa na ka bynta baroh 342 tylli ki longiing kumba la pynsngew da ka HPC sha ka sorkar lada ka kwah ban pynkynriah noh ïa ki na katei ka jaka ba ki sah mynta. Tangba, ka shong pat ha ka jingstad jong ka sorkar lyngba ka blueprint ba ki pynkhreh mynta kumno ban leh.
Dang ha kine ki khyndiat sngi ka sorkar jylla ka la pynbna ba la kumno kumno hapoh ka 15tarik mynta u bnai kin kynduh biang bad ka HPC. Na ka liang u Symbud Myntri Rangbah u la dep ruh ban kren shai ba lada jia ba ka HPC kam pdiang ïa kaei kaba ka sorkar ka tyrwa kim banse ban ïaid beit shakhmat ïa ka kam kumba ka long naduh ba sdang kata ha kti jong ka Kashari.
Khnang ba katei ka kam kan ym bteng ban sahteng la sngewdei ban kyntu ruh ïa baroh kiba don bynta khamtam ïa ka HPC ba kin long kiba jynsur mynsiem lang da kaba pdiang ïa kaei kaba ka sorkar ka tyrwa ha ki. Lehse ka sorkar jylla ruh kan ym leh kano kano kakam kaba lah ban pynduhnong ïa ki hynrei kan dei beit na kabynta ka jingbit jingbiang jong ki hi kum ki para nongshong shnong ka jylla.
