Shillong, Naiwieng 05 : U Bah Process T Sawkmie, MLA barim hynne ka sngi u la ong ba ka ishu Inner Line Permit (ILP) bad ka ishu ban pynrung ïïa ktien Khasi bad Garo ha ka khyrnit ba Phra jong ka Riti Synshar (constitution) jong ka India ka dei baroh ba la ïa shim khia lang da baroh namar kine ki dei ki ishu jongka jaidbynriew.
“Naduh ka sorkar, ki MLA, ki MDC, ki MP bad baroh ki Sengbhalang kiba don hapoh ka jylla, ka Khasi Author Society, ki paidbah ka jylla baroh kawei ki la shim khia lang ïa kane ka kam namar kane ka la dei ka ishu jong ka jaidbynriew,” ong u bah Sawkmie.
U kyrmen skhem ba ha kane ka kynti kaba mynta ka sorkar NDA hapoh ka jingialam u Myntri Rangbah duh ka ri u Narendra Modi kan sngew ïa ka jingdawa ki paidbah ka jylla, khamtam ki sengbhalang bad ka Khasi Author Society, kumjuh na ka liang ka sorkar kiba la ïa kynduh ïa ki heh duh ka Ministry of Home Affairs (MHA) hapoh Delhi.
U la pynpaw ruh ba kane ka dei ka sien kaba nyngkong ba ki seng bhalang, ka KAS bad ki political party kin leit ban pynlong ka jingïakhih hapoh Delhi.
