Ka Ïingdorbar ka dei ka thymmei u khun Khasi ban sei ia ki nia ki jutang ban im ka jaitbynriew: Adelbert

Shillong, Nohprah 14: Ka Dorbar Shnong Mission Compound ka la rakhe ïa ka jingdap 25 snem ka Dorbar Hall Cum Indoor Stadium Mission Compound ha kaba u Bah Adelbert Nongrum MLA ka 17th North Shillong Constituency u la long u kongsan bad u Bah Ronnie Wahlang MCS Additional Deputy Commissioner u la long u Symbud Kongsan, ha ka jingïadonlang u Prof Don Kupar War General Secretary, u Bah Khraw Kupar Paswett Assistant Secretary bad u Bah Tomley Moore Rumnong Rangbah Shnong.
U Bah Adelbert Nongrung haba kren kum u kongsan u la ong ba ka ïingdorbar ka dei ka thymmei u khun Khasi ban sei ïa ki nia ki jutang, ban im ban shngaiñ ka lawei ka jaitbynriew, katba ha kine ki sngi ki ïing Dorbar ki sdang ban tlor bad synjor bad i kumba kin jah bad kin duh kin dam noh.
Ha kane ka sngi kum u kongsan u MLA u la pynlait ïa ka ‘Sound System’ ha ka jingdonlang u Bah Ronnie Wahlang Additional Deputy Commissioner East Khasi Hill, u rangbah shnong u Bah Tomley Moore Rumnong, u secretary shnong u Bah Don Kupar War, ki nongïalam ki seng longkmie, ki khun samla bad kiwei.
Haba bteng ïa ka jingkren ha ka jingïalang u Bah Adelbert Nongrum u la ong ba ki rangbah shnong ki long ki païa kiba skhem jong ka jaitbyndriew bad ki dei ki païa ban pynkhlaiñ ïa ka jaitbyndriew Khasi kaba long kyrpang tam ha ka pyrthei.
“Ki lai mawnongrim ki dei kiba donkam ha ka longïing longsem kata ban pynim, ban pynneh bad ban pynshngaiñ, khnang ba ngin lah ban ai jingshngaiñ ïa ka lawei ki longdien bad ka pateng ka ban sa wan,” la ong u Bah Nongrum.
Na ka liang jong u, u la ai jingïaroh ïa ki nongïalam shnong ka Mission Compound ba ki la leh ïa ka nuksa kaba dei eh ha kaba ki la kynmaw burom ïa ki nongïalam shnong ki ba la leit noh bad ai ba kin long ka nuksa ba bha sha kiwei pat ki pateng ki ban dang wan jong ka jaitbynriew Khasi.
“Yn ym don kaei kaei kaba lah ban leh dalade, tang marwei ngi lah tang ban pynjot, hynrei da kaba tylli lang ngin lah ban tei ban pynbha, ban maramot bad ban pynwandur sha ka lynti kaba bha,” pynkut u Bah Adelbert Nongrum.
Ha kane ka prokram la ïoh ka jingkren halor ka khana pateng jong kane ka Dorbar Hall Cum Indoor Stadium Mission Compound na u Bah Tawny B War Assistant Rangbah Shnong, la ïoh ka jingrwai kyrpang, ka jingkren na u Symbud Kongsan u Bah Ronnie Wahlang bad kiwei kiwei pat ki prokram.