Nongstoiñ, Nailur, 03: Ka Hynñiewtrep Youth Council Ri Muliang Circle kaba hap ha West Khasi Hills, ka la ïoh ban pynskhem sa ïa kawei ka tnad treikam ba thymmai kata ka HYC Mawdiangsnam Unit. Ha ka jingpyntian smai kaba la long ha Dorbar Hall shnong Mawdiangsnam, la pynïaid ïa ka jingïalang da u samla Shaiñborlin Syiemlieh GS HYC Ri Muliang Circle.
U Samla Distarborlin Wanniang President HYC Ri Mulïang haba ai jingkren, u la ong ka HYC ka ieng triang ban ïada ïa ka khyndew bad ïa ka Jaitbynriew. Ka seng ka ïai mih shakhmat ban mad ïa ki jingeh bad ban ïarap ïa la ki paradoh parasnam. Kumba long mynta ka seng ka ieng ban ïakhun ban don ha Syndah ka Hima Nonglang, ban pynphai noh ïa ki jaka ba la ai da ka sorkar MDA sha ka Assam. Watla bun ki langiong hynrei ka seng kan ïai ïaleh khamtam ban peit pyrman ïa ka jingpynbeit kaba ar.
U samla Willbirtsoon Kharsyiemlieh GS Lai Lyngdoh Circle, u la kyntu ïa ki dkhot ban ïa tylli bad ban ïakhun na ka bynta ka Jaitbynriew ban ïa mih ryntih ha kano ka por ba ka Jaitbynriew ka donkam. U Samla Readyferdynan Sun Organising Secretary, u la ong la HYC ka ieng na ka bynta ban ïakhun ïa ka ILP. U la ong ba watla ka sorkar jylla ka la mynjur hynrei ka sorkar kmie kam pat leh eiei haduh mynta bad ka seng kan ïai ïakhun. U la kyntu ruh ïa ki dkhot ba ym dei ban ïa don bynta bad ki Political Party.
U Samla Lumlang Kharsyiemlieh President HYC WKHD u la pyntian smai ïa ki dkhot ka HYC Mawdiangsnam Unit bad u la kyntu ïa ki shipai ka HYC, ban long kiba la khreh namar ka jaka ka dei ka jaka kaba eh kaba yn mad bun ki jingeh. Watla katta ka HYC kan ai ka kti kadiang kamon ha man donkam. U la ong ruh ka HYC ka kyrshan ïa ka jingpynbeit pud hynrei ka pyrshah ïa ka jingdie bad ai pud ha ka Assam.
