Ka HSPDP ka ïeng skhem halor ka hok bad ka jingshisha kumba la ïalam da u Bah Hoping: Michael Thongni

Nongstoiñ, Risaw, 20: Katba nang mih ki sngi ka Hill State People Democratic Party Rambrai Jyrngam Constituency, ka la nang khlaiñ bad ïoh mynsiem da ka jingwan pynïasoh jong ki samla haman la ki shnong naduh Rimuliang Zone Rambrai zone bad Mawlangsu zone.
Nalor ki samla bad ki rangbah, ki longkmie ruh ki la sdang ban trei shitom ban leit sha ki shnong ki thaw ban thung ïa ki tnad trei kam khlem da ap ïa u kyrtong na ka bynta ban pynkhlaiñ ïa ka party shuwa ba ka election ban jied ïa ki nongmihkhmat sha ka Ïingdorbar Thawaiñ ka jylla ha u snem ban wan.
Kumta hadien ba kiba bun ki samla ki la wan ban rung kum ki dkhot ba pura ha ka party ha ka sngi balang, ki nongïalam ka HSPDP Youth Wing kata u bah Michael Thongni secretary Youth wing central body u samla Pynshai Joel Dkhar Joint secretary Youth wing central body, kong Badariti Lyngdoh Nonglait President Women Wing central body, lem bad kiwei iwei ryngkat u bah K.P.Pangñiang President HSPDP central body, ki la hiar sha Rambrai ban pdiang burom ïa ki samla, ki longkmie bad ki rangbah kiba la wan ban pyni sha ka party ba kynthup ruh ïa ki nongkyrshan ba rim kiba mih noh ha u 2018 hynrei kiba la wan phai biang sha ka party.
Ha ka jingïalang ha ïing dorbar jong ka Rngi Lower Ïew Rambrai bad shuwa ban pynskhem ïa ki nongkitkam jong ka Youth Wing Rambrai Zone, la pdiang burom ïa ki nongkitkam jong ka Youth Wing ki ban sa pynshekm ha katei ka sngi, ki rangbah, ki longkmie bad ki samla kiba la wan ban pynïasoh da kaba pyndeng ïa ki muffler jong ka party.
Hadien ka jingpyndeng ïa ki muffler la ïoh ïa ka jingkren na u bah Michael Thongni bad Kong Badariti Lyngdoh Nonglait. U bah Micahel Thongni haba ai jingkren ha katei ka sngi u la ong ba ka Hill State People Democratic Party, ka dei ka party trai ri kaba la rim tam ha ka jylla bad kaba ïeng halor ki nongrim jong ka hok bad ka jingshisha. Kumba u (L) maieit Hoping Stone Lyngdoh u ba la seng ïa ka u ju hikai ban trei hok bad kiar na kaba ñiew shilliang khmat ïa ki paitbah ki nongïalam jong ka party, haduh mynta ki dang bud thik ïa ki jinghikai jong u.
U la ong ruh ba ki don bun bah ki nongmihkhmat kiba la jop na ka party hynrei kip het jyndat noh, namar ba ki kwah ban leit sha kiwei pat ki party kiba tyrwa shuki. Nalorkata lada ki leit sha kiwei pat ki party ki iohlad ban bamsap katba ki mon. U la pynshai ruh halor ka jingeh kaba ki samla wad kam ha kine ki sngi ki ïakynduh khamtam ha West Khasi Hills, namar ka jingleh shilliang khmat bad ka jingnoh shilliang jong ka tarajur jong ka sorkar.
Ha kaba ïadei bad ka jingeh jong ki samla wad kam utei u nongïalam ba hakhmat jong ka Youth Wing, u la ong ba ka thong ba hakhmat eh jong ka HSPDP ha kane ka kynti, ka long ba lada kan jop bad kan ïohlad ban don lang ha ka liang synshar kan ïakhun tyngeh ban thaw ki lad ki lynti ban ai kam ïa ki samla.
Ka kong Badariti Lyngdoh Nonglait President jong ka Womens Wing central body, haba ai jingkren ha katei ka sngi ka la ong ba ha ka Jaitbynriew Khasi Pnar, ki kynthei ki dei ki nongri nongsumar ïa ka jait ka khong bad ka burom jong ka kur ka jait, ka ïing ka sem, ka ri bad ka jaitbynriew ka shong eh ha ki kynthei.Nalor kata ka la ong ba kumba ka sorkar ka la pynkupbor kyrpang ïa ki kynthei ka por ka la dei ba ki kynthei naduh ki samla haduh ki longkmie kin shim ïa ka jingkitkhlieh ban pynbha ïa ka synshar khaddar bad ban tei pat ïa ka longbriew man briew. Ka la ong ruh ba ki longkmie jong ka Rambrai Jyrngam ki la dei ban kyndit bynriew noh bad ban thaw thymmai ha ka pyrkhat pyrdaiñ bad ka synshar khaddar, khnang ba ki khun ki kti kin lait na ki jingeh ha ki por ban wan.
Ki nongkitkam ka HSPDP Youth Wing Rambrai Zone ki long President Bah Khiebor Lyngkhoi (Mawrang), Vice President Amrichbadonal Kharbani (Nongkroh) bad Noveal Sohshang (Nongkroh), Secretary Ferdinal Mawtyllup (Mawthungmarwei), Joint Secretary Pyndap Lyngkhoi (Ramsningwar), Treasuresr Lamphrang Lyngkkoi (Umsiej), Advisers Bah Tai Nongsiej, Bah Driosly Lyngkhoi bad bah Pailot Nongphud. La pynskhem ïa kine baroh da u bah K.P.Pangñiang President rangbah ka party.