Ka HNYM ka dei ban shim ka jingkitkhlieh lada mih ka jingïakynad hapdeng ki Garo bad Khasi ha Raid Marwet

Nongpoh, Naitung, 04: Namar ka jingïai kren bad ïai ban jong u nongïalam ka seng HNYM u Bah Louis Dohtdong President, lem bad katto katne ngut ki Rangbah Shnong, halor ka jinglong Rangbah shnong ki Garo haki shnong ba hap haka Raid Marwet wat hadien ba ïa katei ka kam la dep ban pynbeit da ka District Council bad ka Hima Mylliem ban thung da u Rangbah Shnong Pyllun, bad kane ka jingleh jong utei u nongïalam seng bhalang ka lah ban wanrah pynban ka jingïakynad hapdeng ki Garo bad Khasi.
Haba kren sha ki lad pathai khubor mynta ka sngi naka liang u Paiem Ken Syiem u la pynpaw ka jingsngewkhia kaba jur halor ka jingleh jong u Bah Louis Dohtdong wat hadien ba ka District Council bad ka Hima kila dep ban pynbeit ïaka kam haki shnong ba long Rangbah Shnong ki Garo, hynrei utei u nongïalam u kren kajuh shi kajuh ka phang, bad I kumba utei u nongïalam u kwah ban pynkhie thma kum ha Manipur hapdeng ki Khasi bad Garo, namar haduh mynta ki Khasi bad ki Garo kiba shong ba sah hapoh ka Raid Marwet ki shongsuk shongsaiñ khlem kano kano ka jingïakynad.
Na ka liang u Syiem ka Raid Marwet u la ther ruh ïa utei u nongïalam ka seng HNYM ba um dei ban wan mushlia ïaki kam ka Raid Marwet namar um tip eiei shaphang ka Raid, hynrei u la shu wan leh kontraktor hapoh ka Raid tang ban wan pynkulmar shnong, bad lada jia ba mih ka jingkynad hapdeng ki Khasi bad Garo ha katei ka Raid, u tei u nongïalam ka seng HNYM u dei ban shim ka jingkitkhlieh ryngkat bad katto katne ki Rangbah Shnong.
Shuh shuh halor ka jingkynnoh da u Bah Louis Dohtdong halor ka jingdonkti jong u Syiem ban die jaka sha ki bar jylla, naka liang u paiem Ken Syiem u la kyntaid mardor halor katei ka jingkynnoh namar ka kot bala pyni da u Bah Louis Dohtdong ka dei naduh u snem 2004 bad hakatei ka por um pat shimti ïa ka kam kum u Syiem bad kadei tang ka kam ban ïalam bakla ïa ki paidbah.