Mairang, Nailur 03: Ka Hima Nongkhlaw kaweoi na ki Hima kiba don ha Ri Khasi ka la don naduh u snem 1524 bad mynta ka Hima ka la pynkhreh ban rakhe ïa ka jingdap 500 snem.
Halor kane, ka Hima ka la thung ïa ka Special Committee ne ka Jubilee Committee ka ban pynkhreh pynkhrum ïa kane ka jingrakhe ka ban sah kynmaw hapdeng ki Hima Khasi.
Ka Committee ka la shong pyrkhat kam mynta ka sngi bad ka la rai ban sdang ïa kane ka jingrakhe mynta u snem la kumno kumno ha ka taïew ba nyngkong u bnai Nohprah bad yn pynkut ha u snem ban wan.
U Syiem ka Hima, uba long ruh u Chairman jong ka Jubilee Committee, u Pa’iem PM Syiemlieh, u la ïathuh ba ka Hima Nongkhlaw ka don ïa ki kot ki sla ne ki record kiba biang ban pynshisha ba ka Hima ka la don naduh u snem 1524 ha kaba u Syiem ba nyngkong eh jong ka, udei u Sher Sing. “Ngi sngewkmen ba kum ka Hima ngi don ki jingthoh kiba biang kiba pyni bad pynshisha ba ka Hima ka la don da ki jingthoh ban pyni ba ngi la dap san spah snem”, la ong u Syiem da kaba bynrap ba ki don ruh ki kyrteng jong ki Syiem kiba synshar ïa ka Hima naduh katei ka snem.
U Syiem Khynnah, u Pa’iem KM Syiemlieh, u la ong ba kane ka jingrakhe kan long kaba kyrpang bad ka ban sah kynmaw pateng la pateng namar kham ñiar ba ngin lap ïa ki jingthoh ki ban ïathuh ïa ka jingsdang jong ki Hima. Kumta ka Dorbar Syiem ka la pynkhreh ban pynlong ïa kane ka jingrakhe da kaba pynlong ïa ki Prokram bapher bapher.
U Myntri Lyngdoh Nongum, u Bah Boldness Lyngdoh Nongum u la ong ba ïa ka jingdap san spah snem ha ka ktien phareng la tip kum ka Quincentenary. Ha kane ka jingrakhe kan don ruh ka jingpynmih ïa ka thup sah kynmaw ne ka Souvenir ha kaba kin don ki jingthoh kiba kordor bad kiba myntoi shibun na ka bynta ka Hima bad na ka bynta ka ri bad ka jaidbynriew.
