Shillong, Nailur, 04: U Myntri Rangbah ka Meghalaya u Conrad K. Sangma bad u Myntri Rangbah ka Assam u Himanta Biswa Sarma ki lah ban bteng biang ha u bnai Risaw ïa ka wat kaba ar na ka bynta ka jingïapynbeit ïa ki hynriew tylli ki jaka kiba dang don hapdeng ka jingïakajia pud.
Ha ka jingïakren bad ki lad pathai khubor ha ka sngi Balang u Sangma u la ïathuh ba u la pynsngew ïa kane ka kam ha u Myntri Rangbah ka Assam ha ka jingïabam jamiet lai taiew mynshwa.
“Baroh arngut ngi la rai ba la kumno kumno ngin bteng biang ïa ka jingïalang pynbeit pud ha u bnai Risaw,” la ong u Sangma.
Haba pynpaw ba ka wat ïa pynbeit pud kaba ar ka dei kaba kham jwat u Myntri Rangbah u la ong, “namarkata, ngi hap ban da phikir bha katba ngi dang ïaid shakhmat ban ïakren pynbeit ïa ki jaka kum ka Langpih, Psiar, Khanduli, Block I bad II, namarba ngi sgnewthuh ba ki don bun ki jyrwit jyrwat. Kim long kiba suk kum ha ka wat kaba nyngkong.”
“Namarkata, watla ka jingangnud bad ka jingthmu jong ngi ka long kaba skhem kumba mynshuwa hynrei namar ka jinglong jingman bad ki jaka, ngi kwah shisha ban husiar katba ngi nang ïaid shakhmat khnang ba ngin lah ban pynbeit ïa ka ha ka rukom kaba dei bad ha ka rukom ha kaba ngi lah ban wanrah ïa ka jingïasngewthuh jingmut na baroh lang,” u la bynrap.
Ka bynta ba nyngkong jong ka jingïakren pynbeit pud ha ka wat kaba ar hapdeng ka jylla Meghalaya bad Assam ka la long ha ka 23tarik, Jymmang, 2023.
Ki 6 tylli ki jaka ba don ha ka jingïakajia pud ki kynthup ïa ka Langpih, Borduar, Nongwah-Mawtamur, Deshdoomreah, Block-I & Block-II, bad ka Khanduli-Psiar.
