Ka G20 : Ki sienjam na ka bynta ka koit ka khiah bad ka bha ka miat ki longkmie, ki khynnah bad ba dang khie samla

Ka jingbei tyngka ha kaba ïadei bad ka koit ka khiah jong ki longkmie, ki khynnah, bad ki khynnah ba dang khie samla ka long kaba kongsan na ka bynta ka jingkiew ka ïoh ka kot kaba ïaineh ha kylleng ka pyrthei. Man ka snem, ha ki ri G20 bapher bapher, ki don jan ar million ki jingiap ba lah ban ïada hapdeng ki longkmie, ki khunlung ba dang shu kha, ki khynnah bad ki khynnah ba dang khie samla – ba kynthup ka jingiap ha ka por ba dang kha. Ha kine ki snem, ki bynta ba kongsan jong kine ki jingjia ki long ki “saw tylli ki C”: ka covid-19, conflict, climate change, bad ka cost of living crisis. Kine ki jingeh ki la wanrah ka jingma ha ka koit ka khiah bad ka bha ka miat jong ki longkmie, ki khynnah bad ki khynnah ba dang khie samla. Ka jingñiew beiñ bad ka jingkiew ki jingkylla ka suiñbneng, ka jingshngain ha ka jingïoh bam, bad ka jingduk ki long ki daw ba kongsan jong ka jingbym kiew ka koit ka khiah jong ki longkmie, ki khynnah bad ki khynnah ba dang khie samla.
Ha u snem 2000, namar ka jinglong ka suiñbneng ka la don palat 150,000 ki jingiap ha kylleng ka pyrthei bad ka jingkiew ka jingban khia namar ka jingpang ha kylleng ka pyrthei, ha kaba 88% ki dei ki khynnah. La antad ba 80% ki briew ba la duh ïa ki ïing ki sem na ka jingjia lynshop ki bor ka mariang ki dei ki longkmie, namar ka jingïapher ha ka ïoh ka kot bad ka imlang sahlang hapdeng kynthei bad shynrang.
Kum kine ki jingïapher, ka jingpynjulor ïa ka mariang, bad ka jingduh ïa ka jingim bad ka bai seng ki long kiba pynkhuslai. Kumta, ki longkmie ki dei kiba kham shah ktah, bad kane ka pynkiew shuh shuh ïa ka jingduk jong ki longkmie. Ha kylleng ka pyrthei, ki longkmie ki bteng ban kamai kham duna ban ïa ki Rangbah, wat haba ki kyrdan jong ka jingnang jingstad ka ïakatjuh.
Ki ri G20 ki dei kiba don ka jingbun briew kaba lai pawa ha kylleng ka pyrthei bad ki sienjam ba ki ïashim kyllum ki don ka jingktah ha kylleng ka pyrthei. Ka G20 kadei ban shim ïa ki sienjam mynta ban kyntiew ïa ka koit ka khiah jong ki longkmie, ki khynnah bad ki khynnah ba dang khie samla bad ban tehlakam ïa ka jingduh ki mynsiem briew. Ka India mynta ka pynlong ïa ka G20 presidency bad ka kut jingmut ban kot sha ka jingpynïoh ka koit ka khiah ïa baroh bad kyntiew ïa ki lad ai jingsumar ha kylleng ka pyrthei. Kum ka nuksa, ka India ka la tyrwa bun ki sienjam na ka bynta ki lad digital ha kaba ïadei bad ka koit ka khiah kum shi bynta ka rukom treikam digital ba la sdang ha u 2021. Kine ki atiar digital ki ïarap ha ka jingpynrung kyrteng ïa ki billion ngut ki briew khnang ban lah peitngor ïa ka jingpyndep ïa ka jingai tika, bad ka jingai palat 1.78 billion dose ki tika covid-19. Ka India ka la tyrwa ruh ïa ki sienjam halor ka jingïadei hapdeng ka suiñbneng bad ka koit ka khiah, namar ka jingktah ki jingkylla ka mariang ïa ka koit ka khiah jong ki paidbah, bad ki sienjam ban don ki lad pynkhreh kiba kham biang ïa ki khlam. Ka long kaba donkam ban pynthikna ba kine ki sienjam kilong kiba peit ïa ka jinglong kynthei ne shynrang bad kiba peit ruh ïa ka rta, kum ban shu kdew, lyngba ka jingpeit ïa ki lad ai jingsumar kiba peit bniah shuwa ïa ki longkmie.
Ka jingïatreilang ki ri ka long kaba donkam na ka bynta ka jingïasam ïa ki rukom kiba biang bad ka jingweng ïa ki jingeh. Ka nuksa ka long, ka jingpdiang ïa ka jingkylla ka suiñbneng ka donkam ïa ki rukom treikam kiba ryntih, bad ïa ki ri ban kyrshan ïa ki sienjam jong kiwei kiwei ki ri ban pynmih pisa bad ban kyntiew ïa ki jinglah pyndonkam ïa ki teknoloji lyngba ka jingïatreilang ka phang Shathie bad Shathie bad ruh ka phang Shathei Shathie. Ki ri G20 ki dei ban shim shuh shuh ïa ka sienjam kaba kongsan ban jop ïa ki jingeh ba ïadei bad ka koit ka khiah bad ka bha ka miat ba ki longkmie, ki khynnah bad ki khynnah ba dang khie samla ki mad.
Kaba nyngkong, ki ri G20 ki dei ban phaikhmat kyrpang ban kyntiew ïa ka jingpynbiang pisa ban pynkhlaiñ ïa ki rukom treikam ba ïadei bad ka koit ka khiah, ban pynïar ka jingïoh ïa ki lad jingshakri ba kongsan ba ïadei bad ka koit ka khiah, bad ban peit ïa ki jingpynthut ïa ka koit ka khiah ha ka imlang sahlang kum ka jingduk bad ka jingïapher hapdeng kynthei bad shynrang. Ki jingbei tyngka ha ki jingdon jingem digital lyngba ka jingpeit bniah ïa ka jinglong kynthei ne shynrang kan pynduna ka jingban khia jong ka kam bym ïoh jingsiew, kyntiew ïa ka bha ka miat, plie ki lad ïoh kam, kyntiew ka jingïashim bynta ki nongbylla, pynduna ïa ka jingiapher ha ka jingpyndonkam ïa ki lad digital da ki shynrang bad kynthei, kyntiew ïa ka jingseisoh, bad wanrah ïa ka jingkiew ka ïoh ka kot. Kaba ar, bun ki ri ki ïakhun ban pynneh ïa ki rukom pynlut pisa ha ka koit ka khiah kaba kumba ju pynlut ha ki por shuwa ka khlam. Kane ka ktah ïa ka koit ka khiah jong ki longkmie, ki khynnah bad ki khynnah samla ha kylleng ka pyrthei. Donkam ïa ki sienjam jong baroh ban ïarap ïa ki ri ban pynkhlaiñ ïa ka jinglong ka koit ka khiah jong ki da kaba khring shuh shuh ïa ka jingïarap na ka bynta ka koit ka khiah, bad ka jingwad ïa ki lad kiba lah ban ïaineh ban pynduna ka jingban khia ka jingshah ram. Ka G20 kadei ban kyrshan ïa kane.
Kaba lai, ngi donkam ïa ki data system kiba khlaiñ ban peitngor bad pyntreikam bha ïa ki polisi bad ïa ki prokram. Namar ba ki ri G20 ki don kumba 85% ka GDP jong ka pyrthei, ar na ka lai shah ka jingdon briew ha ka pyrthei bad ki don ruh ka bor ha ki kam saiñ pyrthei, ki don ha ka kyrdan ban kyntiew ïa ka jingwad bniah bad ka jingtei ïa ki teknoloji kiba kham bha kiba ïadei bad ka koit ka khiah bad ruh ïa ki dawai tika.
Haba bei tyngka ha kine ki bynta bad shim ïa ki rai, ka long kaba donkam ban kynthup ïa ki longkmie, ki khynnah bad ki khynnah ba dang khie samla. Kaba saw, ka jingbei tyngka ha ki por ba sdang ka jinglong khynnah ka long kaba kongsan, kynthup ki polisi ba ïarap ïa ki longïing bad kiba ai jingïada ïa baroh ha ka imlang sahlang. Kum kine ki jingpynlut ki kyntiew ïa ka bor sngewthuh, kaba kynthup ïa baroh ki sap kiba ktah ïa ka jingtbit jong ki briew – ka ban ïalam sha ka jingkiew ka ïoh ka kot kaba kdup lang ïa baroh. Ka jingtehlakam ïa ka jingbym ïoh kam ïoh jam ki samla ha kylleng ki ri G20 ka donkam ban kyntiew ïa ki sap treikam jong ki khynnah samla kum ka jingtip ha kaba ïadei bad ki kam digital, bad ka jingtei ïa ka jingheh jingsan kaba sngewthuh ïa ka teknoloji bad ka mariang.
Ka G20 kadei ban phaikhmat kyrpang sha ka koit ka khiah bad ka bha ka miat jong ki longkmie, ki khynnah bad ki khynnah ba dang khie samla da kaba pynskhem ïa kane ka kam kaba hap pyndep. Kane ka donkam ïa ka jingaiti, ka jingiar, bad ka jingbei tyngka kaba ïaineh, kumjuh ruh ka jingïatreilang hapdeng ki ri bad ka jingïatylli khnang ba ki longkmie, ki khynnah, bad ki khynnah ba dang khie samla, lane ka ri kim shah ïeh shadien.
Ka koit ka khiah bad ka bha ka miat jong ki longkmie, ki khynnah bad ki khynnah ba dang khie samla ka long kaba kongsan na ka bynta ka jingkiew ka ïoh ka kot kaba lah ban ïaineh ha kylleng ka pyrthei. ïa kane ym lah ban kyntiew khlem ka jingïalam ka G20 kaba khlaiñ.
Jingtip ba lyngkot:
Amitab Kant: U Amitabh Kant udei u G20 Sherpa jong ka India, ba mihkhmat ïa ka ri ha ka G20 bad u la long teng kum u CEO jong ka NITI Aayog. Ka Helen Clark kadei ka Chair jong ka PMNCH Board bad ka Myntri Rangbah duh barim jong ka New Zealand.