Ka Electricity Amendment Bills ka dei ban myntoi ki heh spah ym u paidbah : CCORMAU
Shillong, Nailar 08: Ban pyrshah ïa ka jingthmu ka sorkar pdeng ban wanrah ïa ka Electricity Amendment Act 2022 ha Parliament ha ka sngi Nyngkong ka seng ki nongtrei bad ki barikor hapoh ka shatri jong ka Cordination Committeeof Registered MeECL Association(CCORMAU) ki la pynlong ïa ka jingïakhih ha ka ophis treikam ka MeECL ha Lumjingshai, Shillong ban pynrem jur ïa ka ka sorkar pdeng kaba ym shym la ïa syllok shuwa bad ki nongtrei ha ki tnad bording, ki nongpyndonkam bording ha shuwa ba kan rah ïa kane ka aiñ ha ka ïing dorbar Parliament kaba trhmu ban aiti pynïaid sha ki riw shimet ïa ka jingsam bording.
Haba kren bad ki lad pathai khubor u Bah PK Shullet u la ong ba kane ka jingpyrshah jong ka CCORMAU ka dei halor ka jingleh donbor ka sorkar pdeng banwanrah ïa kane ka aiñ khlem da pan jingmut shuwa na ki paidbha ban shah ktah.
U Bah PK Shullet u la ong ba lada pyntreikam ïa kane ka aiñ kan don ka jingïatyngkhuh bad ka tnad kum ka MeECL ha kiba bun ki khep ha kaba ki kompeni kin pan beit ban pynpopin bording tang sha ki jaka ban ïoh nong katba ïa ki jaka ba ka kompeni kam i ïoh jingmyntoi dei ka MeECL kaban hap ban kit khlieh.
U la ong ruh ba da kane ka aiñ ka sorkar pdeng kan knieh noh ïa ka hok ka sorkar jylla ban pynïaid ïa ka State Load Dispatch Center(SLDC)
U Bah Arju Dkhar u Vice-President jong ka Union u la ong ba kane ka jingthmu ka sorkar ban wanrah beit ïa ka aiñ rew ka thong bad ka jingthmu jong kaleh ka sorkar kadei ban pynmyntoi ïa ki paralok heh spah jong ka sorkar bad u la maham ruh ba lada ailad ïa kum kane ka aiñ rew ban long aiñ dei u paidbah uban long sohpdung bad uban mad jingeh.
“Kan sa poi ka bor ba u Myntri Rangbah bvad ki MLA baroh kin hap leit ban kyrpad ïa ka sorkar ban pynhiar ïa ka bai thang boding namar kin tieng ïoh rem ilekshon” ong u bah Arju
U Bah Arju u la kynthoh tyngeh ruh ïa ka sorkar halor ka dor ka Software jong iu Smart Meter kaba ka mut ban thied da kaba ong ba kum kane kam ju jia koit ba tang ka software kan poi haduh katta ka dor.
“Ngi dawa ba ka sorkar ka dei ban phah ïa kane ka aiñ rew sha ka Parliament Standing Committee bad lada kam leh ïa kane ka CCORMAU ryngkat ryngkat ka National Coordination Committee of Electricity Employees and Engineers ngin pynlong ka jingïakhih kaba tyngeh” ong ki nongïalam ka CCORMAU