Nongstoiñ, K’lyngkot 30: Ka por ba ka sorkar ka ailad ïa ki kyrtong jong baroh ki seng Saiñpyrthei ban pynlong ïa ki jingïalang paitbah na ka bynta ban pynshai ïa ki mat ïaleh election jong ki ka sah sa tang kumba ar phew san sngi. Ha kine ki arphew san sngi baroh ki kyrtong ki la pyndonkam lut ïa ka buit ka jong ki ban khroh ban kjor ïa ki paitbah ba kin ai ka jingkyrshan ban pynjop ïa ki bad ym lah ban len ba ki don shibun ki kyrtong kiba pyrshang ban kthong ïa ki paitbah wat da ka spah ruh.
Ha kaba ïadei bad ha kane ka election ban wan u bah R.S.Sohlang sordar barim ka shnong Markasa haba ïakren bad u nongthoh khubor, u la ong ba ka Mawthadraishan Constituency ka dei kawei na ki Constituency kiba ka jingïaleh ka dei beit tang hapdeng ki ar ngut ki kyrtong kata u bah Brolding Nongsiej na ka UDP u ba dei ruh u MLA ba mynta bad u bah Shakliar Warjri u kyrtong ka HSPDP.
U bah Sohlang u la ong ruh ba haduh mynta ka jingïatan tyllai hapdeng ki paitbah ka dei hapdeng kitei ki ar party, namar katba nang mih ki sngi ka sur na ki paitbah ka la nang beh sha u kyrtong ka HSPDP. Hynrei ki paitbah nongkyrshan jong u MLA ba mynta ruh ki ïeng skhem hi triang khlem khih phaloh shane shatai.
Ha kaba ïa dei bad ka jingdon kiba ong ba katba nang mih ki sngi, ki paitbah kiba leit pynïasoh sha ka NPP ban kyrshan ïa ka kong Biolinda Lyngdoh Nonglait ka kyrtong jong ka NPP. Hynrei um lah ban tip pat haduh ban da poi ka sngi thep vote, katno ki paitbah ki ban leit ai jingkyrshan ïa ka NPP. Hynrei ka NPP ruh ka don la ki jong ki buit treikam bad ka NPP ruh ka don la ka jingkyrmen.
U bah W.Sohlang uwei pat na ki nongïalam barim ka UDP u ba la la ai ka jingkyrshan ba pura ïa ka HSPDP, u la ong ba ha kine ki sngi u kyrtong bad ki nongïalam ba hakhmat jong ka HSPDP ki dang ïatrei shitom miet la bad sngi ban tur sha ki shnong ki thaw kiba hap ha ka thaiñ Mairang, ban leit pynlong ïa ki jingïalang bad bun ki paitbah ki la wan ban pynïasoh sha ka party ban ai jingkyrshan ïa u bah Shakliar Warjri.
