Ka ED ka dei ban leit shaduh lyndet halor ka kam tih dewïong beaiñ ha jylla, Dr. Mukul

Shillong, Jymmang 26: U Nongïalam ka liang pyrshah u Mukul Sangma u la ong ba ka Enforcement Directorate (ED) kan hap ban leit shaduh lyndet ïa kaei kaba la jia haba ïadei bad ka kam tih dewïong beaiñ ha Meghalaya.
“Ki jinglap ka Enforcement Directorate kadei ban long la ki jong ki kam jong ka aiñ hynrei ban bynrap ïa kane, kin hap ban leit shaduh sha lyndet bad kaei kaba la jia,” ong u Sangma sha ki lad pathai khubor.
Ïa kane u la kynthoh halor ka jingtohkit ka ED kaba la pyni ba ka don ka jingtih dewïong thliew khnai bad kumjuh ruh ka jingkit beaiñ ïa u dewïong ha Meghalaya.
Ka ED ka la sdang ïa ka jingtohkit halor ka FIR ha Shallang.
Ka ED ka la ïathuh, “Ha ka jingwad, la shem ba ki manager, ki sardar bad ki nongbylla ki la don bynta ha ka kam tih dewïong beaiñ ha kane ka thaiñ kum ka Jadigittim, South Garo Hills da kaba pyndonkam da ki tiar ba leh ha ki por mynshwa. Ka la lap ruh ba ki la don haduh 20 tylli ki jaka tih dewïong kiba la pynïaid beaiñ ha Era Aning bad thaiñ Goreng. Katto katne ki nongbylla la aiti noh sha ki pulit ban tohkit ïa kane ka kam kaba don ka jingartatien halor ka jingithuh bad kiba dei na kaei ka ri.”
Ka ED kala ong ba ka jingtohkit shuh shuh ka pynpaw ba ka kynhun kadei kaba don ki briew na Assam bad Meghalaya kiba la pynsuk ïa ka jingkit ïa u dewïong beaiñ. Kine ki kynhun ki shait pan ka pisa kumba T. 1.27 lak haduh T. 1.5 lak kawei ka trok na ki trai par dewïong ha ka kyrteng jong ka commission ne patronage case. Une u dewïong ba la tih beaiñ la pynlang ha ki depot ha Jogighopa, Assam. Nangne la kit sha ki karkhana bapher bapher kum ki karkhana shna dewbilat, ki brick kiln, ba shna nar bad ki steel industry bad ki illegal coke plant.
Shuh shuh u Myntri Rangbah barim u la buh ka jingkylli halor ka jingpulom jong ki bor pynïaid distrik bad ki pulit ban shim kam pyrshah ïa ka kam tih bad khaïi beaiñ ïa u dewïong.
“Phi don ki deputy commissioner, phi don ki briew hapoh ka jingpynïaid ki DC, phi don ki SP, phi don ki police station, phi don ki OC, phi don ki pulit bad phi don ki ïew. Phi kren shaphang ki kam tih dewïong beaiñ, lada ka don ka kam tih dewïong beaiñ phin don ruh bun ki briew na shabar ha ki ïew, haba leit sha Shallang, phi lah ban ïoh bun bha ki briew nabar, hato kam dei ka kamram ki pulit ban kylli kidei kiei? Lada ki sah ha kino kino ki jaka kam dei mo ka jingkitkhlieh jong ki pulit ban wad?” u la kylli.
“Lada don 100 ngut ki nongbylla ki wan ha ki kali jong ngi la ïohi ba ki ïaid ne jam beit shakhmat ïa jaka talasi ki pulit. Kine baroh ki sakhi ba lah ban ïohi, bad ki ïew ruh ki die ïa ki tiar ba donkam ha ka rat coal mining,” u la ong.
U Sangma shuh shuh ula bynrap, “Namar kata kaei ka jingkitkhlieh jong baroh kito ki briew kiba la ïoh ka tulop jong ka sorkar kiba la siew ruh na ka pisa ki paidbah naka bynta ban ïada ïa ka bha ka miat jong ki paidbah ka jylla.”