Ka Dorbar Iktiar Paidbah kam dei satia ka jingkwah myntoi saiñ pyrthei, pynshai u CEM

Shillong, K’ Lyngkot 18: U CEM ka KHADC u Bah Pynïaid Sing Syiem u la pynshai halor ka jingkynnoh ba ka jingïalang Dorbar Iktiar Paidbah ba la khot da ka Khasi Hill Autonomous District Council (KHADC) ha Polo ka kam satia ka jingkwah myntoi saiñ pyrthei namarba la jan ka election sha ka KHADC.
U Bah Pynïaid Sing Syiem Chief Executive Member ka KHADC u la kyntait war ïa kane da kaba kdew ba u kongsan ha kane jingïalang u dei u Lat ka Jylla u bym ju shah liang ha kano kano ka rukom.
Haba kren sha ki lad pathai khubor u Bah Pynïaid Sing Syiem u la ong, “Ka jingkynnoh ba ka jingïalang ka long ban ai jingmyntoi ha ka saiñ pyrthei, ka dei kaba bakla lada dei kumta nga tharai kam u Lat ka Jylla ruh un ym wan kum u kongsan namar u Lat u long u bym shah liang.”
U Bah Pynïaid Sing Syiem u la bynrap, “Ha kane ka jingïalang la khot lut ïa ki nongïalam ha ki seng saiñ pyrthei ki sengbhalang, ban ong ka dei ka kam saiñ pyrthei ngam tharai ba kan dei ka kam politic. Kane ka dei ka kam jaitbynriew bad ha ka por election ngi don ka uniform hynrei ha kum kane ka kam jaitbynriew kan bha ban buh sharud ïa ka kam saiñ pyrthei”.
Halor ka jingïalang u Pynïaid Sing Syiem u la ong ba kane ka sngi ka dei ka ban sah jingkynmaw na ka bynta ka jaitbynriew, namar kane ka jingïalang paitbah kaba la tip kum ka Dorbar Iktiar Paidbah.
“Ka daw ka long ba hadien 72 snem ba la don ïa ka District Council kaba la aibor ïa ki MDC ban shna aiñ. hynrei, mynta dang ïoh ïa ka aiñ ban ithuh ïa ka khyndew ka shyiap, ban ithuh ïa ka jingtrei kam ki seng samla seng kynthei ki rangbah shnong bad ki sengkur,” ong u CEM.
“Ngi sngewdei ban don kane ka jingïalang ba hakhmat u ba bun balang ba ki paidbah kin sakhi ba la pynkupbor ïa ki, Kane ka long hadien ba la ïoh ïa ki ar tylli ki aiñ ba kongsan kum ka Khasi Hill Autonomous District (Administration of Elaka) Amendment Act 2023 bad ka Khasi Hill Autonomous District (Khasi Social Custom of Linage) Amendment Act 2023 kaba dang shu ïoh jingmynjur na u Lat ka Jylla bad ngim pat ïoh ka lad ban pynshai paitbah halor kine ki artylli ki aiñ”.
Shuh shuh u la bynrap ba ka jingmyntoi na kine ki ar tylli ki aiñ ka long halor ka jingtreikam ki seng samla, ki seng kynthei, seng longkmie mynta la ithuh da ka aiñ, baroh shi katta la shu trei namar ba ka la ju don ha ki shnong ki thaw, hynrei, mynta ka la don ha ka bor ka aiñ, ba la ïoh ban pyntreikam bad ai jingithuh ïa ki sengkur bapher bapher, bun na ki sengkur ki dorbar kur la ïoh ka jingithuh.
“Kumta u la kyntu ruh ïa kiwei ki kur ba kin wan ban register hapoh ka KHADC, ha shuwa kane ki dei ban lum ïa ki dorbar kur, kin jied ïa ki nongkitkam bad ai ka jingthoh halor ka jingïaid lynti ka kur,” u la ong.
U Bah Pynïaid Sing Syiem u la ong ba kane ka long ka jingïatylli, halor ka thymmei ka jaitbynriew bad ka jingai jaitkmie kadei ruh ka Iktiar Paitbah ban kyrsiew ruh ïa ka rai ban kynmaw ïa ka lariti lajong.
“Hangne ka pyni shai ba da ka jingdon ka 6 Schedule hapoh ka Article 244, la ai bor ïa ngi ban shna aiñ, kaba la ai bor ban thaw aiñ ha kiba bun ki liang ban dang don ruh ban hap ban pyrkhat ban dang pynbha shuh shuh ïa ka,” ong u CEM.