Ka dei ka jinglyngkot jingmut u Bah Prestone ban pynduh kam pynroi tang namar kim dei na ka NPP : George

Shillong, Ïaïong 30: U Vice President ka All India Trinamool Congress (AITC) uba dei ruh u MLA barim ka Umroi u Bah George B Lyngdoh u la ong ba ka jingmaham lupa u Symbud Myntri Rangbah ka jylla u Bah Prestone Tynsong ban pynsyllang ha kaban ai ïa ki kam pynroi sha ki Constituency ba mihkhmat da ki MLA bym dei na ka NPP ka dei ka jinglyngkot jingmut bad ka jingbym pat biang ka rynïeng rynïot ban shimti ïa ka kam nongïalam ha ka jylla.
Haba ïakren bad u Mawphor u Bah George u la ong ba ka jingshisha ka dei ka kamram jong ka sorkar ban ai ki kam pynroi sha u paidbah nongshong shnong ka jylla wat lada ki dei na ka Constituency kaba la mih khmat da u MLA ba don ha ka liang Pyrshah.
“Ki buh thong ban pynlong ïa ka jylla kum kata ka 10 billion dollar economy hynrei ha kano ka dur yn lah ban kynjoh namar ban kiew ka jylla donkam ka roi ka par ha man ki kyndong kynshrot katba u Symbud Myntri Rangbah u la maham lupa ban ym ai kam pynroi sha ki MLA bym dei na ka juh ka party. Kane ka pyni ba ha ka sorkar MDA ba ai uba donkam kam pynroi un syllang namar kim dei na ka NPP bad ïa ki MLA NPP wat la ka Constituency kam bymdonkam shuh ki kam pynroi pat kin pahuh bad ka pyni ba ka sorkar ka kwah ba uba duk un nang duk ksew bad uba riewspah un nang kiew arshah ka jingdon spah,” u la ong.
“Hato la kheiñ ba kito ki nongshong shnong ba dei na ka Constituency ba jop da ki MLA bym dei na ka NPP kim dei shuh mo ki nongshong shnong ka jylla ne u Symbud Myntri Rangbah u la kheiñ ba ki dei na kawei pat ka ri bad ka jylla ne,” u la bynrap.
U la ong ba lada peit na ki nongïalam ka jylla ha ki snem kiba la leit wei haba ki la long ki Myntri ka sorkar ki da shim ba ka dei shisha ka lyngkor kaba ki hap ban kit na bynta ka jylla baroh kawei khlem da pynïapher la ki dei ki nongshong shnong ba jop da u MLA ba dei na ka party ba synshar ne u MLA na ka Liang Pyrshah.
“Shaei shuh ki nongïalam kum ki snem kiba mynshuwa kum u Bah BB Lyngdoh, u Bah EK Mawlong, bad kiwei dei ki nongïalam kiba kit shisha ïa ka lyngkor ym kum ha ka sorkar kaba mynta kaba la maham lupa ban pynsyllang lada ki MLA ki wan kam pynroi,”.
“Hato phi sngew ïahap mo ba lada leit pan kam pynroi na ka sorkar kaba dei ban peit ïa ka roi ka par ka jylla ba lada leit haduh 100 sien ruh kan ym ai lymda pat dap 101 sien hynrei lada dei ki MLA na ka party jong ki pat lada kim donkam ruh hana ban tyrwa hi bad kato ka jingkren u Bah Prestone uba dei u Symbud Myntri Rangbah ka jylla ka pyni ba kum u nongïalam u dang lyngkot jingmut shaba palat,” u ba bynrap.
Haba kylli halor ka jinglap jong u ha ki san snem kiba la leit kum u MLA ka liang pyrshah u shah pynsyllang ne em, u Bah George u la ong, “Ka jingpynsyllang ka don shisha bad lada pan kam pynroi ki pynsyllang hynrei da ka jingïai buddien ïa ki kam pynroi khlem man thait don hi kiba ngi ïoh wat la kiba bun ngim ïoh ruh,” u la ong.