Ka BJP kam lah ban thet kti ïa ki kam bamsap bad ka synshar thurmur ka MDA: Dr Mukul

Shillong, Nohprah 01: Ka All India Trinamool Congress (AITC) kaba shong ka ka liang pyrshah jong ka iing dorbar thaw aiñ ka jylla ha ka sngi palei ka la ong ba ka BJP kam lah ban tet kti ïa ki kam bamsap bad ka synshar thurmur jong ka sorkar MDA ba la ïalam da ka NPP namar ka BJP ruh ka dei shibynta jong ka sorkar MDA.
haba kren sha ki lad pathai khubor u Dr Mukul u la ong ba wat ka sorkar pdeng kam shym la leh eiei ban pynthikna ba ka synshar kahdar ha ka jylla kan long kaba beit bad kaba ryntih bad ong ba ka BJP namarkata kam lab ban saitkhuid ïa kiei kiba jia ha kane ka sorkar namar ka ruh ka don lang ha ka MDA.
U la ong ba kaei kaba jia ha ka jylla mynta ha ka jingshisha ka sorkar pdeng ka la dei ban leh eiei hynrei ka leh bym ïohi pynban u la kynnoh.
Shuh shuh u la ong ba ka sorkar pdeng kam shym la shim kino kino ki sienjam ha ba ïadei bad ka bamsap bampong kaba la jia ha ka jylla ha ka jingpyntrei ïa kiba bun ki skhim.
U la ong ruh ba ka BJP kaba don ha ka sorkar kam lah ban sait khuid halor kane bad kumjuh ka UDP ruh.
“Ka long kaba i thamula ban ïohi ba ki seng kiba don ha ka sorkar ki kdew kti uwei ïa uwei wat la ki dei lang shi bynta jong ka sorkar ruh. Ka BJP ne ka UDP kam lah ban saitkhuid halor ka bamsap ba kim don kti,” u la ong.