Ka BJP kam don jingtip ba thmu wan pynïasoh u MLA ka West Shillong sha ka party : Mawrie

Shillong, Nailar 14 : U President ka BJP ha kane ka jylla u bah Ernest Mawrie u la ong ba ka Party kam don jingtip ei ei ruh em halor ka jingthmu wan pynïasoh u MLA ba shah sospon ka Congress na ka West Shillong Constituency u bah Mohendro Rapsang sha ka party shwa ka election 2023.
U la kren ïa kane halor ka jingkam jong u National Exerutive Member ka BJP uba dei u MLA ka Pynthorumkhrah u bah A.L Hek ba u bah Rapsang u dei uwei na ki MLA ban wan pynïasoh sha ka BJP.
“ Kane ka dei tang ka jingkren jong u bah Heh shimet namar u bah Rapsang um pat wan ïa kynduh ïa ki nongïalam ka party khamtam ïa nga u President halor kane namar kat haduh mynta kam pat don kano kano ruh ka jingïakynduh” ong u bah Mawrie.
U la kren shai ruh ba uno uno u briew uba kwah ban ïoh tiket na ka party ki hap ban ïaid lyngba bun ki kyndon ban wan pynïasoh sha ka party kum kita ki primary member bad ki dei ban long ki nongtrei ba shit rhem ka party ym dei ban shu wan pan tiket te ïoh beit. U la ong lada phai sha ka Assam kiba bun kin kynmaw ba ki don bun ki MLA kiba shah pynduh tiket na ka party bad ka daw ka long ba kim ïaid da ki kyndon bad lynti ba dei ban ïaid.
“ Ka BJP ka dei ka party kaba kham pher namar phi hap ban ïaid thik ia kiei kiba la buh ba phi dei ban ïaid bad bud bad lada ym lah kam mut ba yn shu ai tiket beit ïa uta u A, B ne C. Kane ka dei ka rukom pynïaid kam jongka party ym dei tang hangne ha Meghalaya” ong u bah Mawri.
U bah Mawrie u kren bynniaw wat ïa ka jingpdiang dkhot ba dang shen ïa ki nongkyrshan u MLA ka AITC na ka Mawsynram Constituency u bah Himalaya Shangpliang namar u la ong ba la leh kyrkieh palat. Ha ka jingshisha ka don ka Mandal ha Mawsynram bad ki la dei ban ïaid lyngba katei ka Mandal.
“ Ngam sngew pyrshah ïano ïano ruh hynrei ka daw ka dei ba ka rukom pynïaid jongka party. Ngi pdiang ban wan pynïasoh hynrei haba don ka Mandal ki la dei ban ïaid lyngba ka Mandal. U la ong ba kino kino kiba wan pynïasoh ruh ki dei ban ïaid shwa lyngba u President ka party. Kane ka dei ka rukom pynïaid jong ngi ba kum ka National Party u President jongka party u don ka bor ban pyntip shalor ym dei kiwei kiwei ki dkhot ne MLA ruh. U dei u President u ban shim rai bad u ban pdiang ïa ka jingwan rung sha ka party ruh”. ong biang u bah Mawrie.
U la iathuh ruh ba shen ka party kan sa khot ban ïakren bad pynïasuk ïa baroh ar ki MLA jongka kata ïa u bah Hek bad u bah Sanbor Shullai. Kane ka kam ka dang sahteng bad la dep ïoh jingbthah na Delhi ba dei ban pynbeit noh ïa kane ka kam bad dei ban pynlong noh ïaka State Executive Meeting ruh.