Shillong, Naitung, 25: U President jong ka BJP Meghalaya State Unit Bah Ernest Mawrie ha ka sngi Ba-ar, u la pynrem jur ïa ka jingjia ha Tura bad ong ba ka BJP Meghalaya State Unit kam shym la kyrshan ïa kino kino ki jingïakhih ban pynmih ïa ki jingïaumsnam bad ka party ka khlem ai ruh ïa kano kano ka jingbthah ïa ka Mahila Morcha ba kin leit ïashim bynta ha kum kine ki jingïakhih.
U Bah Mawrie u la ong ba ka Disciplinary Committee jong ka Party kan sa leh ïa kaba donkam bad aiti ïa ka kaiphod pyrshah ïa kito kiba donkti hapoh ka 15 sngi.
“Ka jinghiar thma ïa ka Chief Minister Office (CMO) ka dei kaba hap pynrem jur bha bad ka BJP ka kwah ba baroh kito kiba donkti ki dei ban shah kem mardor” ong u Bah Mawrie ha u kyrwoh.
U ong ruh ba ka Party kan sa pan ïa ka kaiphod na ki District Officer bad hadien kane kan sa leh eiei pyrshah ïa kito kiba donkti ha kum kine ki kam runar.
U Bah Mawrie ula ong ba ka BJP naduh kaba sdang hi kam ju pynshlur ïa kino kino ki jingïakhih da ka lynti jong ka jingïaumsnam.
“Ka BJP ka dei shibynta jong ka Sorkar bad ka ieng lang bad kano kano ka rai ba la shim da ka Sorkar na ka bynta u paidbah” u la bynrap.
