Shillong, Naiwieng 06 : U heh ka BJP ha ka jylla ba dei ruh u Myntri Sorkar, Bah AL Hek ha ka sngi Balang u la ong ba ka BJP bad ka Congress da lei lei ruh kan ym lah ban trei lang.
“Ka Congress bad ka BJP kin ym lah ban treilang. Kumno phi lah ban ong ïa kata? Hato u Myntri Rangbahduh u lah ban ïatrei lang bad u Rahul Gandhi?” ong u Bah Hek haba kren bad ki lad pathai khubor.
Kane ka jingkren jong u Bah Hek ka dei hadien ba ka National People’s Party (NPP) ka la kynnoh ba ka rai jong ka BJP ban aireng lang ha katei ka lympung kan ktah ïa ka Congress ha kane ka elekshon shiteng samoi kaban long ha Gambegre da kaba ong ruh ba ki ïa trei lang ban pynjop ïa u Saleng ha ka elekshon MP ba dang shu dep.
Hynrei haba kyntait ïa kane, u Bah Hek u la ong ba ka BJP kam don bynta ei ei halor ka jingjop jong ka Congress ha kane ka elekshon ba dang shu dep ha rilum Garo.
“Ka Congress ka don la ka jong ka nongrim, ki jong ki nongkyrshan bad la u jong u kyrtong bad kidei ruh ban ïakhun la ka jong. Ha kajuh ka por ka BJP ruh ka don la u jong u kyrtong, la ki jong ki nongkyrshan bad ngin ïa khun ïa ka elekshon la ka jong,” u bynrap biang.
Na ka liang utei u heh BJP u pynpaw ruh ka jingkyrmen ba u kyrtong ka party ba dei ruh u MDC ba mynta ka Tura, u Bernard N Marak un lah ban jop ha kane ka elekshon shiteng samoi na Gambegre.
Shuh shuh u ong ruh ba ka ishu jong ka BJP hi kadei tang ban wanrah ïa ki kam pynroi ha ki constituency bad bun ki skim kiba la pyllait da u Myntri Rangbahduh ka Ri.
Shuh shuh u ong ba ha ka elekshon MP kaba la dep ka BJP ka la kyrshan ïa ka NPP hynrei ym dei shuh ha kane ka elekshon shiteng samoi ha Gambegre. “Ngim don ei ei ban ong pyrshah ïa kino kino ki seng saiñpyrthei,” u la bynrap biang.
