Shillong, Nohprah 20: U Myntri Rangbah, u Conrad Sangma, u la kren da kaba tyngeh ba ka Assam ne mano mano ruh kim lah ban tei Beat House ne ki ktem Pulit hapoh u pud u sam jong ka jylla Meghalaya.
ïa kane, u la pynpaw ha kaba ïakren bad ki nongthoh khubor mynta ka sngi hadien ba la wai ka jingïalang jong ka kynhun Myntri
Ki nongïalam jong ka Shnong Mukroh, hynnin ka sngi ha ka por ba ki wan sha Shillong ban ïakynduh ïa u Myntri Rangbah, ki la ïathuh ba Khasi Student Union (KSU) kila kynnoh ba ka sorkar Assam kala sdang tei thymmai biang ïaka Beat House hapoh ka shnong Mukroh.
U Conrad u la ong ba haduh mynta um pat ioh jingtip ba ka sorkar Assam kala tei thymmai ïa ka Best House ha Mukroh hynrei shen un sa phah ktien sha u Myntri Rangbah ka jylla Assam ban pynthikna ba ka sorkar kam dei ban pynieng kino kino ki jait jingtei hapoh u pud u sam ka Meghalaya.
U Conrad u la ong ba na ka liang ka sorkar jylla kan iakren biang bad ka sorkar Assam ba kum kine ki jait jingtei kim dei ban ïeng ha u pud u sam ka jylla Meghalaya khnang ban nym jia shuh ki jingiakynad hapeng ki paidbah nong shong shnong jong baroh artylli ki jylla ha ki thain khappud.
“Ngan sa ïakynduh ïa u Myntri Rangbah jong ka Assam, u Himanta Biswa Sarma ban ïakren halor kane ka phang, namar kane ka jingtei ïa ki ïing ki sem ne ki jaka treikam jong ka sorkar ha ka jaka jong kiwei pat ki jylla ka wanrah ka jingïakynad bad ka jingsngewsih pat hadien habud”, u la ong.
U Conrad u la pynksan ba ka shnong Mukroh ka hap ha Meghalaya bad naka liang ka sorkar Assam ruh kam don hok ban pynieng Beat House, ne Out Post ne Border Out Post hapoh u pud u sam ka jylla.
U la ïathuh ruh ba u la ïakren ïasyllok bun sien bad u Sarma ha ki ar sngi ba la leit bad yn don ki jingïakren ha ki sngi ban wan ban pynthikna ba kan ym don kano kano ka jingpynshit ne jingpynkhih, da kaba bynrap ruh ba kan don ka jingïakren jong kiba kham halor na baroh ar liang.
