Ki bnai tlang ki dei ki bnai kiba kham bun bad jan baroh ngi jied ba kan long ka por ne ka aïom na ka bynta kino kino ki kam lehkmen bad khawai sngewbha, khamtam lei ki kam ïathoh shong kurim, ki kam ïabam sngewbha bad kiwei pat. Ka aïom tlang ka dei ka por kaba bun na ngi ki kham ïalong laitluid bha namar ba kadei ruh ka por ba ïa ïoh shuti ki khun ki kti kiba dangrit bad kiba dang leit skul. Namar ba ki bnai lyiur nalor ba ka dei ka aïom slap ka dei ruh ka por kaba kiba bun ki ïa bunkam bad ïabeh sha ki kam ki jam bad khamtam ka jingïabeh sha ki skul bad ki jaka pule. Hynrei ka por tlang ka dei ka por kaba wat kito kiba trei sha ki jaka ba jngai ruh ki ïoh shuti bad ïohlad ban wan sha la ïing la sem shi sien shi snem lehse. Kumta ka aïom tlang ka dei ka por jong ka jingkmen bad jingïaleh sngewbha bad ïa khawai bad ïabam ïadih sngewbha. Hynrei sngew synei pat ban ïoh sngew na ki bapli ki riew tymmen ba ki ud namar jong ki rukom pynkhreh bam ha kiba bun ki khep ha kine ki sngi ba ki la shubun beit tang ki bam nongwei khamtam ka rukom pynkhreh bam da ki Chinese.
Ha ka jingïadon lang jong ki riew rangbah bad ki riewtymmen ha ki kam lehkmen bad leh sngewbha la ha ki ïing ki sem ne ka imlang sahlang ka wanrah ka jingsngewshngaiñ ïa baroh khamtam ia kito ki longïing kiba pynlong ïa ka kam. Ka jingdon jong ki riew rangbah ba phalang bha ïa ka jingkyrkhu U Blei, namar ha ba ngi peit ïa ki bad ïa ka rta ka jinglong tymmen jong ki ngi sngewthuh shai ba ka dei ka bor kaba phylla ka jong U Blei ba la pynlah ïa ki ban don ïa ka jingim kaba koit ba khiah ba ki dang lah ban ïai ïadon lang kumta. Ka jingdon ïa ka met kaba koit ba khiah ka long shisha kawei na ka mat kaba sah pyrto eh ha ka jingim jong ngi bad kawei na ki buit ba rieh ban don ïa ka met kaba koit ba khiah ka dei ka jingnang jong ki kumno ban im ïa ka jingim kaba beit bad kaba ryntih ne kaba ki ong da ka ktien phareng discipline ban sumar ïa la ka jong ka met naduh kaba kilan met bad haduh kaba bam ïa ki jingbam kiba long ka jingmyntoi ïa ka met.
Haba ngi peit ïa ka rukom bam rukom dih lehse ngi lab ban ong ba kan lei lada bam katba la pynkhreh ruh khamtam ha ki kam khawai dawai, hynrei ngim dei ban klet ba ha kine ki sngi ha kum kine ki aïom ka jingleit ïabam khawai ka la jan long jan man la ka sngi ne man la ka taïew. Sngew synei ïa ki bapli ki riew tymmen haba ki ud bad kiba bun ki bam ba la pynkhreh ha kine ki sngi kim da pyrkhat than eh shaphang ki riew tymmen. La don ruh kiba la kyrpad ban ai rynsan lem ïa kum kane ka jingsngew jong ki khnang ba kito kiba khot pynlong ïa ka kam kin ïoh ïa ki jingtip kiba donkam kum kita. Ki pynpaw ba ki jingbam riewlum ne ki jingbam ba ju im ban bam man la ka sngi ki long ki jingbam kiba ïadei bad ka koit ka khiah bad khamtam ki jingbam kum ki Indian item ki ïahap na ka bynta jong ngi ki briew kiba im ha kine ki bynta jong ka pyrthei..
Namar kata ka long kaba donkam ban sngewthuh lem ïa ki bapli ki riew tymmen kiba ieit ban ïadon bynta ha kum kine ki kam khawai dawai ban pynshngaiñ lem ïa kane ka pateng kaba dang kiew shaphrang. Ki trai jong ka kam ki lah ban sngewthuh khambha haduh katno ka jingïadon bynta lang jong ki riew rangbah ne riew tymmen kiba kum kita ban don ïa ka jingpynkhreh kaban ïahap lang ruh na ka bynta jong ki. Kan long hi ruh ka jingkyrkhu bad ka jingmyntoi haba ngi lah ban bynta ha ka rukom kaba ki ïasngewtynnad lang. Hooid ym baroh ki nongpynlong ki leh klet ne ïaid lait na kaba peit phikir lang ïa ki riewtymmen bad riew rangbah, hynrei haba don kum kitei ki khep bad ki riew rangbah bad riewtymmen ki ud bad pynpaw jingeh ka long kaba sngewdei ba ngin ïapashat jingmut lem khnang ba kumno ngin ym klet ban peit ba ki lad jingpynkhreh kin long kiba biang lang. Haba ki bam ïa ka bam kaba koit ba khiah wat hadien ba ki leit phai ïing ruh kam don ka jingktah ïa ki bad kin ïaisah ki jingkynmaw babha bad jingkynmaw ieit ïa ka sngi lehkmen kaba kum kata.
