Ka Additional Secretariat ka jingmyntoi kaba khraw ïa ki nongshong shnong ka thaiñ Garo

Shillong, Naiwieng 08: U Myntri Rangbah ka jylla u Conrad K Sangma ha ka sngi Saitjaiñ u la leit ban jurip ïa ka Additional Secretariat Complex, Tura ban bishar ïa ka jingtei jong ka bad ïa shim bynta ruh ha ka jingduwai na ka bynta ka jingbha ka jingtei ïa kane ka Additional Secretariat Complex ha Dakopgre, Tura.
Ha kane ka sngi la pynïeng ruh ïa u païa ba nyngkong kaba long kum ka dak jong ka jingshim khia jong ka sorkar ban pynkhlaiñ ïa ki kam jingtei bad ka jingpynbha ïa ki kam sorkar ha thaiñ Garo Hills.
Haba kren ha kane ka prokram u Sangma u la ong, “Ngi don ha Tura ha kaba yn sa tei ïa ka Additional Secretariat. Kane kadei ka sngi ban sah kynmaw naba ngi la lah ban buh ïa u maw nongrim jong kane ka projek kaba kongsan. Nga dap da ka jingsngewnguh ïa ki nongïalam niam ba kynthup ïa Reverend Dilseng bad u Father Januarius, ba ki la wan ban duwai bad kyrkhu ïa kane ka prokram. Kane ka Additional Secretariat ka dei ka kam kaba khraw na ka bynta ki paidbah, khamtam ki nongshong shnong ka Garo Hills, naba kane kan ai ka jingshakri kaba khraw ha baroh ki liang.”
Na ka liang u Myntri Rangbah ha kane ka jingleit jurip u la pynpaw ruh ïa ka jingsngewhun haba ïohi ba ka kam ka la ïaid shakhmat. Ha kane ka sngi la ïoh ka jingduwai na Rev. Dilseng M. Sangma, bad kiwei kiwei ki prokram nalor ka jingduwai pynkut na Fr. Januarius S. Sangma, Principal ka Don Bosco College, Tura.Kiwei kiba la shim bynta ki long Deputy Commissioner ka West Garo Hills Vibhor Aggarwal, IAS, Superintendent of Police, West Garo Hills Abraham T. Sangma, IPS, bad kiwei ki heh ophisar.