Ha kine ki khyndiat sngi baladep, la i shutia ïa ka jingïaknieh burom halor ka 290 Klur tyngka kaba la mang da ka Ministry of Road Transport and Highway na ka bynta ban moramot ïa ka surok NH 6 ha ki bynta jong ka Jaiñtia Hills khamtam eh ka East Jaiñtia Hills District ban leit sha kiwei pat ki 4 tylli ki jylla jong ka thaiñ shatei lammihngi jong ka ri India, kata ka Assam, Manipur, Mizoram bad Tripura.
Ki paidbah na East Jaiñtia Hills, khamtam eh kiba hap ha ka elaka Narpuh, ki la mad jingeh shisha na ka daw jong ka jingsniew palat kane ka surok naduh ki snem kiba ladep, khamtam haba wan u slap, ha kaba ki hap ban mad ruh ïa ka jingsahkut bad dheng kali bad ktah ruh ïa ka leit ka wan jong ki. Dei namar kane ka daw ki Sengbhalang kum ka KSU bad ki nongsynshar shnong ki la pynlong ka jingïakhih kaba la bunsien bad wat ban khang ruh ïa ka jingtreikam ka Toll Gate jong ka National Highway Authority of India (NHAI) ha katei ka thaiñ. Wat ka High Court of Meghalaya ruh ka la shimkam bunsien ïa ka jingsniew kane ka surok. Pynban ka sorkar jylla kam shym la patiaw satia bad dei tad haduh mynta u snem ba la sdang ban paw khubor ba ka sorkar India ka la pynsngew ba ka la pynkhreh ban pynbha ïa kane ka surrok.
Hynrei dei tad ha ka 3 tarik mynta u bnai haba katto katne ki kot khubor ki la pynpaw ba ka sorkar pdeng lyngba ka MoRTH, ka la mang 290 klur tyngka ban pynbha ïa kane ka surok. Ki lad pathai khubor ki la pynpaw ruh ba kadei hadien ka jingleit ïakynduh bad ai shithi u MP ka Shillong, u Dr. Ricku AJ Syngkon ïa u Myntri ka MoRTH, u Nitin Gadgari ba ka Ministry ka la khot ïa ka jingïalang bad u MP bad pyntip ruh ba la mang ïa kane ka pisa 290 Klur tyngka.
Hynrei kane ka jingmih khubor ha ka jaka ba kan long ka jingkmen ba la ïoh ïa ka pisa ban pynbha noh ïa kane ka surok ban lait ki paidbah na ka jingjynjar ka leit ka wah bad khamtam eh ban lait ka jinglehraiñ ka jylla, pynban ka la nang pynlehraiñ shuh shuh hakhmat ka pyrthei, haba ka la don ka jingïaknieh burom mano ba long ka daw ban wanrah ïa kane pisa ban pynbha ïa kane ka surok.
Ka sorkar MDA 2.0, kaba la kam ba u Myntri Rangbah ka jylla, u Conrad Sangma, u la leit ïakynduh ïa u Gadgari ha ka 26 tarik u Jylliew mynta ka snem, ka la kam ba dei ka jingtrei shitom u Myntri Rangbah kaba la pynlong ïa ka sorkar pdeng ban mang ïa kane ka pisa. Nalorkata ki don ki MLA kiba la kynnoh ba u MP jong ka Shillong uba dei na ka Seng VPP, u la shah kam ba dei ma u, uba la lah ban pynbor ïa ka sorkar pdengh ban mang ïa kane ka pisa. Katba ha ka jingshisha u MP ka Shillong, ym shym la ïohi satia ba un kam ha ki lad pathai khubor ba dei ma u, uba la wanrah ïa kane ka 290 klur tyngka.
Kaba lyngngoh ka long ba ka sorkar MDA ka la pyndonkam syndon da u Secretary ka tnad PWD (R&B) ban pynshai ïa ka jingpynmih khubor ba dei u MP ka Lok Sabha uba la ïakren ban wanrah ne pynlong ïa ka sorkar pdeng ban mang ïa kane ka pisa. U Secretary ka tnad PWD lei lei u la kam ba ïa kane ka pisa lei lei la mang naduh u bnai Riasaw jong ka snem 2023. La kdew ruh ba u Myntri Rangbah u la ïai buddien na ka por sha ka por ha kaba ïadei bad kane ka surok. Kane ka jingkwah ka MDA ban pynpaw ba dei ma ka, kaba la wanrah ïa kane ka 290 klur ka la pynlyngngoh hi ngaiñ ïa kiba bun, ba balei u ophisar u kwah ban pynbit tngit ïalade bad ka jingïakwah burom politiks jong ki nongmihkhmat paidbah. U la dei ban sngap beit bad shu pyntreikam beit ïa ka pisa kaba poi ha ka kti jong ka sorkar kaba ma u, u long u shakri.
Bun ruh ki buh jingkylli ïa ka sorkar balei ba haba la mang naduh u Risaw jong ka snem 2023,kam pyntreiikam noh ban pynbha ïa kane surok, hynrei ka sngap pynban jar jar tad haduh ban da mih khubor kaba ai burom ïa u Dr. Ricky Syngkon. Kane ka pyni ia ka jingbishni bad ka jingkwah nam jubor jong ka MDA. Nangta ka pynartatien ruh ia kiba bun halor ka jingsngap jar ba ka lah ban don ei ei ha lyndet haba kim ïathuh paidbah ïa ka 290 klur namar ba ka la don ruh ka jingmynjur na ka sorkar pdeng haduh 24 hajar klur ban pynbha ïa ka surok naduh na Byrnihat shaduh ki bynta ban leit sha Assam lyngba ka East Jaiñtia Hills District.
Nangta ka jingmang pisa ba ïoh na ka MoRTH ruh ka pyni ba kiba don ha ka liang synshar ruh kim thikna katno la nang. Namar ki don ki MLA kiba ong ba la mang 200 klur. Don kiba ong ba la mang 230 klur bad myntapat 290 klur. Hynrei kaei kaba donkam ka long ba dei ban pynbha noh kyrkieh ia kane ka surok, ym dei ka jingïaknieh nongkyndang.
