M anla ka sngi ki mih ki jingjia kiba pynher mynsiem bad kiba pynshong syier ïa ki longing longsem ki bym sngew shngain shuh ïa ka leit ka wan jong ki khun ki kti namar ka jingdon jong ki nongleh kam pyntriem wat ïa ka khynnah skul kaba dang lui lui ban dung da u thyrnia injek kaba ïaid lynti ha Jaïaw ban leit skul, ban pynap tari wat ha ka por mynsngi mynshai ïa ka khynnah skul Auxillium. Dang khyndiat bnai, u nongbylla ha Restaurant u bym don shuh ka rain ka rem pylleiñ pylleiñ wat ha ka por mynstep u nud ban shondur khlemakor ïa ka khynnah kaba dang thmu ban leit sha skul haba ka dang ïaid lynti na Umsohsun sha Mawkhar.
Kine ki jingjia ki la pynsuhjer bha ïa ki kmie ki kpa ki bym sngew shngaiñ ïa ka leit ka wan jong ki khun ki kti tang shu jam shiliang ka kjat na phyllaw iing sha surok.
Dang khyndiat bnai, ki runar ki la pajut ïa ka sohskhor i heprit iba ïaid lynti ha Jaïaw ban leit phai sha la iing hadien ba la wai skul. Ki kmie ki kpa kim nud shuh wat tang ban pyndeng ïa sohskhor ksiar ïa la ki khun kynthei. Wat ha skul ki nonghikai ki hap ban maham lypa ïa ki khynnah ban ym deng shuh ïa ki sohskhor ksiar namarba ka jinglong jingman katba nang mih ki sngi ha nongbah Shillong kam shngaiñ shuh.
Haoid, ym lah ban len ba ki jingjia ba har rukom ki jia beit manla ka sngi naduh ki snem ba la leit noh haduh mynta. Kine ki jingjia ki mih na ka daw ka jingdon jong ki riewbymman
Dang shen ka la mih ka khubor kaba shah lute haba shong kali kamai. Balei eh haduh katne katne ka jingjur ki kam tuh kam thiem haduh katne. Ka jingprong tuh ïa ki dukan, ka jingprong tuh ïa ki ing ka sem kylleng ki jaka ym tang ha nongbah Shillong hynrei wat sha kiwei kiwei ki bynta jong ka jylla ruh ki kynrei bha haduh katta katta.
Baroh ki khmat ki phai sha ki nongdih drok. Ka jingjyllei ki nongdih drok kat shaba phai khamtam leilei ha nongbah Shillong la i thik kumba ym don dorbar shnong, ym don Village Defence Party bad ym don bor Pulit ban kdiah ïa u budlum jong ki nongkhaii drok.
Ka jingwan rung jong u drok nabar ka jylla sha ka jylla Meghalaya ka long kaba shyrkhei haduh katta katta namarba ki nongkhaii kim salia ban kheiñduh ïa la ka jong ka jingim ban pyntuid ïa u drok sha ka jylla namarba ki ïoh ïa ka spah kamai bym hok ban im pahuh pahai.
Haba peit ruh na ka website jong ka tnat Pulit la shem ki kam runar ruser ki jia manla ka sngi. Ki jait pa ki jait ki jingjia ki jia manla ka sngi. Ki riewbymman kiba don lypa ka mynsiem raikut ban leh ïa ki kam runar yn ym lah ban khanglad hynrei donkam pat ïa ka jingpeitngor jong ki bor synshar shnong bad ki bor Sorkar. Lada ka Sorkar ka pyni ïa ka bor yn ym don satia mano mano ruh ba nud ban saham namarba ka dei ka bor kaba hakhlieh ha ka jylla. Hynrei ka jingsynjor jong ka aiñ ka la pynshlur ïa ki nongdih drok ki bym salia ban leh ïa ki kam runar ruser tang ban pyndap ïa ka jingdawa ka met lajong. Ka jingïaid sahuh ki nongdih drok bad ki nongdie khutia mutia ka la pynsuhjer bha ïa ki nongleit nongwan.
Hato ka jingwanrah jong ka Sorkar ïa ka Drug Reduction Elimination & Action Mission (DREAM) Mission kan shu long tang ha ka jingpyni kam tang shipor?
Ki nongdih drok kiba shah kem ki lait noh tang shi por bad ki leit phai biang sha ka jingim kaba rim. Ki longiing longsem khamtam kiba duna ka ïoh ka kot ki lynñiar namarba kim lah ban phah sumar ïa ki khun sha ki Rehabilitation Centre haba ki ngop ha u drok. Ki long kum ki Zombie, sa ka raikhoh kumba ym ju ïoh bam. Hato ki kmie ki kpa kiba kha kim pang ka mynsiem haba ki khun ki kti ki ngop bad shah teh mraw ha u Drok? Hato ka mishon jong ka sorkar kan shu kut tang ban shu kem ïa ki nongkhaii drok? Ka jingngop jong ki khynnah bad ki samla ha u drok ka la long kum ka jingpang khlam bad lada ka Sorkar kam kyndit bynriew ban shna ïa ki Rehabilitation Centre kiba ïarap ïa kine ki khynnah bad ki samla khlempep ka lawei jong ka Jylla Meghalaya hadien 15 bad 20 snem kan sa long kaba dum bad ka jylla kan sa ring swai bad ha kata ka por ïano ngin kynnoh?
