Jyllei kiba sah be-aiñ ha Maxwellton Estate, ujor ka KSU sha ka Deputy Commissioner

Shillong, Nailur, 01: Ka Khasi Students’ Union (KSU) Laban Circle ha ka sngi Palei ka la dawa ïa ka Deputy Commissioner jong ka East Khasi Hills ka Kong Isawanda Laloo ban kyndang naphang ïa kiba shong basah be-ain ha Maxwellton Estate kaba don ha Kenchs’ Trace, Oxford Rilbong bad ba ka Deputy Commissioner kan pynsahngeh shisyndon ïa ka jingkyntur pud ki shipai ha Lawsohtun Block 4.
Ha ka jingïakren bad ki lad pathai khubor, u General Secretary ka seng u Samla Reuben Najiar u la ïathuh ba ka jingujor ka KSU ha ka Deputy Commissioner ka long ban dawa ba ka dei ban kyndang ïa ki 150 tylli ki longïing kiba shong ba sah be-ain ha Maxwelton Estate namar bun bah kiba shong ha kane ka jaka ki dei kiba shu sah be-aiñ khlem ka jingtip bad ka jingai jingbit jong ka Dorbar Shnong.
U la ong ruh ba kito kiba shong basah ha kane ka jaka ki ri masi watla kane ka jaka ka dei kaba hap hapoh ka Municipal Area bad ïa ki jakhlia bad ki jaboh baroh la pyntuid beit sha ka wah duid kaba long pat ka jingma ïa ka koit ka khia kiba shong ha ki jaka ba syndan bad kane ka jaka.
U la ong ba ka ïaid ka ieng na kane ka jaka kam long kaba shngaiñ namarba dang shen kawei ka long kmie ka la shah lute ha ki briew kiba dei na kane ka thaiñ. U la ong ruh ba kane ka jaka ka la kylla kum ka ktem awria bad ka jaka ïadie drok.
Ha kaba ïadei bad ka jingkyntur pud jong ki shipai ha Lawsohtun Block 4 na ka liang ka seng ka la kyntu ba ka Deputy Commissioner ba kan shimkha mardor ban weng ïa ki jingker nar ïa ka surok namarba kane ka surok ruh kam dei satia ka jong ki shipai hynrei ka dei kaba la shna da ka tnad PWD.
U la ong ba ka seng ka kyntu ruh ba dei ban weng noh ïa ka jingthoh ba kam trai ba ka dei ka jaka shipai kaba la thoh ha kane ka jaka namar ka jaka ka dei jong ki riewshimet bad jong ka tnad PWD.
“Na ka liang ka DC ka la kular ban shimkhia halor kane ka bynta bad ban bthah ïa ki tnat ba dei peit ban leh ïa kaba donkam” u la bynrap.