Shillong, Nailur, 01: Ka Education Cell jong ka Khasi Student’s Union (KSU) Central Executive Council ha ka sngi Balang ka la ujor ha u Joint Secretary jong ka Meghalaya Board of School Education (MBoSE) u Bah M. Marbaniang halor ka jingbakla ha ka rukom thoh ïa ka kot pule Social Science ha ka Class -X ïa kaba la thoh bakla da kaba pynhap ïa ka Eastern West Khasi Hills District hapoh ka thup jong ka rilum Garo.
Ha kane ka jingïakynduh, ka Seng ka la ïoh ban ïakren ïa kane ka mat ha kaba u Bah M. Marbañiang u la pynpaw ïa ka jingsngew bynñiaw halor ka jingthurmur ka rukom thoh kot khamtam eh ïa ka kot Social Science.
Ka Seng hapoh ka jingïalam jong u Education Secretary ka KSU CEC u Samla Raymond Kharjana ka la pynpaw ba na ka por sha ka por la ju lap ïa kane ka jingdkoh bad ka jingthoh bakla ha ki kot pule.
Na ka liang jong u Bah M. Marbañiang u la kubur bad ka la don ka jingbakla bad yn sa pynbeit noh mardor ïa kane ka kam. U la pynpaw ruh ba ka don ka jingdkoh ha ka rukom bishar jong ka MBoSE ïa ki kot ha shuwa ban pynlait ïa ki kum ki kot pule na bynta ki khynnah pule ha ki kyrdan bapher bapher.
Ka seng ka la pynpaw ruh ïa ka jingthrang ba dei ban pynrung noh ïa ki kot ba thoh da ki trai ri khnang ba kine ki rukom thoh thuhmur ha ki kot pule kin ym jia shuh ha ki snem ki ban wan bad ki ban ïalam bakla ïa ki samla pule bad ba ka pule puthi kan kiew arted ha ka jylla hi baroh kawei.
