Nongstoiñ, Jylliew 17 : Ki kam tuh kam thiem ki la jyllei haduh katta katta haman la ki jaka ha West Khasi Hills. Katkum ki khubor ba la ïoh lum la ong ba ki nongtuh ki la nud wat ban wan tuh ïa ki masi ki blang bad wat ïa ki sñiang bad ki syiar ruh.
Dang ha u bnai ba la dep uwei u nongshong shnong ha Lawrapha, u la shah tuh ki nongtuh saw tylli ki masi na sem ha ka por mynmiet. Nalor kata dang ha kine ki khyndiat sngi, sa ar tylli ki masi jong uwei u briew na ka shnong Ksehkohlong ki la shah tuh na ka jaka the ha ka por mynmiet.
La ong ruh ba utei u briew u don lai tylli ki masi bad ha ka por mynmiet u la teh lang ha kajuh ka jaka, hynrei ynda mynstep pat haba u mut ban leit teh noh ïa ki sha lum, u la lap ba ar tylli kim don shuh bad haba bishar bniah ïa ki dak ki shin, la ithuh shai ba ka jingïaksaid ka jur bha ha kaba kawei ka masi ka la lait phet namar ba dkut u tyllai bad u la ïoh biang ïa katei ka masi.
Haba ïakren bad u bah P.Marshra u la ong ba ki nongtuh ha kine ki sngi wat ïa u sñiang na sem ruh ha ka por mynmiet ki la nud ban wan tuh bad kaba lyngngoh ka long ba u sñiang um lynñiar satia haba kit ruh. U la ong ruh ba ïa ki blang um nud shuh ban leit teh ha lum namar ba u sheptieng ïoh shah tuh.
Haba ïakren pat bad u bah T.Marweiñ, u la ong ba ka jingjyllei jong ki kam tuh masi, tuh blang, tuh syiar bad kiwei kiwei, ka lah ban dei na ka daw jong ka jingkynrei palat ki kam pynïakop khwai dohkha ryngkat ki khalai nusib. Lane ka lah ban dei namar ka jingjyllei palat ki nongdih drok kat haduh ba wat ki shnong nongkyndong ruh ki la shong syier.
U la ong ruh ba ha kine ki sngi ka jinghiar ka ïoh ka kot, ka kamai kajih, ka bylla ka sngi ka la long shaba palat bad ka jingduk tasam ka la shong kulai ïa ki longïing longsem, lait noh kito kiba la don ha ki kam sorkar bad kmie bad kpa bad ki khun, hynrei kiba im da ka bylla ka sngi te wat tang ïa u khaw ban bam ruh ki la shitom ban ïoh.
