Ka Regional Democratic Alliance kaba long ka kynhun ba la thaw da ka United Democratic Party bad ka Hill State Peoples Democratic Party haduh mynta kam pat lah satia ban sei ïa u ne ka kyrtong monlang ban pynïakhun ha ka elekshon Lok Sabha ka ban sa long ha u snem 2023.
Watla kine ki ar tylli ki seng saiñpyrthei ki la ïatreilang ha kane ka kynti ban wad kyrtong, hynrei haduh mynta kim pat lah satia ban shim ïa kano kano ka rai namarba kim pat lah satia ban ïoh da u kyrtong uba kynsai.
Tang shu bna wur wur wer wer, u MLA barim jong ka Mawlai Constituency Bah Process T. Sawkmie u la pynpaw ïa ka mon ba u kwah ban ïakhun ïa ka elekshon Lok Sabha na Shillong Parliamentary Seat, katba u Bah Paul Lyngdoh uba long u Working President jong ka UDP bad ha kajuh ka por u MLA bad Myntri ka Sorkar Jylla u la pynpaw ba um don satia ka mon ban ïakhun ïa kane ka elekshon namarba ka kam MLA bad ka kam Myntri ki dei lypa ki ar tylli ki kam kiba la ban khia ïa u nalor ba u long ruh u MDC jong ka Jaïaw Constiteuncy.
Tang hapoh khyndiat kynta ba u Dr. DRL Nonglait u la pynbna paidbah lyngba ki lad pathai khubor ba um don satia ïa ka mon ban ïakhun ïa ka elekshon Lok Sabha watla ki nongïalam ka UDP ki la pynsngew ïa u halor kane ka kam, mar mar u Bah Process u la pynbna paidbah lyngba ki la pathai khubor ba u dang kwah ban ïakhun ïa kane ka elekshon lada ka UDP ka ibit ban pynieng ïa u kum u kyrtong jong ka.
Hynrei, shwa kane, ka kyrteng jong u nongïalam ka Hynñiewtrep Youths Council u Bah Robert June Kharjahrin ka la paw bha ba un long kum u kyrtong jong ka UDP. Ka UDP ruh mar mar tang hapoh khyndiat kynta ba u Bah Kharjahrin u la shongthait kum u nongïalam Sengbhalang ka UDP, Mawkyrwat Circle ka la pdiang burom ïa u sha ka party.
Kumba lah ban sngewthuh, lada ka UDP ka mynjur ïa ka kyrteng jong u Bah Robert Kharjahrin, khlempep u Bah Process un phaikhmat ban ïakhun noh ïa ka elekshon MDC.
Ki paidbah kiba ju kyrshan ïa ka UDP bad ïa ka HSPDP ki la angnud hir hir lano ka RDA kan pynbna ïa u kyrtong namarba kiwei kiwei ki party ki ladep ban shaid shaid ïa ki kyrtong kiba la dang ban khih khohreh ban lum paid ha ki shnong bapher bapher bad ban leit sha ki prokram bapher bapher khnang ban pan jingkyrshan na ki paidbah.
Ka jingpynslem jong ka RDA ban pynbna kyrtong kan buh jingeh hi ïa ka party namarba kiwei kiwei ki party ki la nang ïaid shakhmat ban lum jingïalang ïa ki paidbah bad lada ka jingpynbna kyrtong ka long kaba thmit palat kan pynduhnong hi ïa kane ka kynhun namarba u paidbah un ym lah ban shu pdiang matlah khlem da ïakynduh markhmat bad u kyrtong.
Haba phai pat sha ka seng congress watla kam pat lah ban pynbna ïa u kyrtong hynrei la sngewthuh ba kan dang hap ban pynieng ïa u Bah Vincent H. Pala uba long u MP ba mynta jong ka Shillong Parliamentary Seat namarba kam don kyrtong da uwei pat u ban mih bujli ha ka jaka jong u Bah Pala khamtam leilei hadien ka jingryngkang diengkper jong ki 12 ngut ki MLA ka Congress sha ka Trinamool Congress shwa ban long ka elekshon sha ka Ingdorbar Thawain ka jylla ha u snem 2023.
