Shillong, Jymmang 21 : Namar ka jingwan jong ka Proseshon Maria kaba 100 kaban long ha Mawlai Parish mynta ka sngi U Blei, na ka liang u MLA ka thaiñ, Bah PT Sawkmie ha ka step sngi Saitjaiñ ryngkat ki ophisar kumjuh ki nongïalam na ka Parish Pastoral Council ki la leit ban jurip kylleng ki jaka ban pyntikna ba ka jingpynkhreh na bynta katei ka jinglehniam kaban sah jingkynmaw shi rta kan long kaba la biang pura nadong shadong.
Ha kane ka sngi, u MLA u la leit ban jurip naduh ki surok kiba kumjuh ka jingpynitynnad ïa ka, kumjuh na bynta ka bording bad ruh na ka bynta ka umbam umdih.
Na ka liang u MLA haba kren ha kane ka sngi, u la ïathuh ba kum u nongmihkhmat mardor hi mar ïa tip halor ka jingpynlong ïa ka Proseshon Maria kaba 100, mardor hi u la shimkhia ban peit ba ka jingpynkhreh kan long kaba paka ryngkat ka jingïatrei lang bad ka Balang. “Nga la shimkhia ruh ban kren ïa ka MeECL ban peit bad ban pyntikna ba lashai ka sngi (22tarik) kan ym don satia ka jinglip bording,” la bynrap shuh shuh u Bah PT Sawkmie.
Katkum ka jingïathuh da u General Secretary ka Mawlai Parish Pastorial Council, Bah Stelin Dkhar, hadien ka Mass Bakhuid kan sa don ruh sa ka Prosseshon Maria ha ka por 1:30 janmiet ha kaba yn rah ïa ka stashu Maria kaba la rah ha ka proseshon Maria kaba nyngkong kaba long ha u snem 1922.
