Jurip ki ophisar ka tnat Forest bad KSU ïa ki ïing ba tei be-aiñ ha Mahadev Khola

Shillong, Nailar, 03: Ka kynhun ki ophisar ka tnat Forest ka Sorkar Jylla ryngkat bad ki dkhot ka Khasi Student’s Union, Laban Circle ha ka sngi Palei ki la leit jurip ïa ki ïing ba la tei be-aiñ ha Mahadev Khola, Shillong.
Kane ka jingleit jurip ka long hadien ba ka KSU ka la ujor ha u Divisional Forest Officer (DFO) ka East Khasi Hills pyrshah ïa ki briew kiba sah be-aiñ ha Mahadev Khola .
La kynnoh ba ka tnat Forest ka la ai jaka ha u snem 1923 na ka bynta ban tei ïa ka Temple ki riewngeit Hindu ha Mahadev Khola na ka bynta ki kam mane blei bad ym na ka bynta ban shna ing shna sem.
Ka KSU ka la kam ruh ba la lap ba ki don 30-40 tylli ki ing bad ki dukan jong ki briew kiba nabar ka jylla ki bym don satia ïa ki kot ki sla kiba biang.
Kum ban shu pynkynmaw hangne, dang shen ha ka 24 tarik u bnai baladep ki runar ki la thombor ïa ki briew kiba shong dukan ha Mahadev Khola. Kine ki runar ki thombor ruh wat ïa kiba leit mane blei bad lute ruh ïa ki jingbam na dukan. Halor kane ka jingjia, ki Pulit hapoh ka jingïalam jong u Superintendent of Police (City) Bah Vivek Syiem ki la hiar mar mar ban pynlong ïa ka jingtokit.
Lai ngut ki briew ki la shah kem, ba kynthup arngut ki khynnah rit ba dang hapoh 18 snem ka rta halor ka jingdonkti ban thombor ïa ki briew ha Mahadev Khola.
Shwa ban leit jurip ïa ka Mahadev Khola, ki nongïalam ka KSU, Laban Circle ki la aiti da ka jingthoh ha u Principal Chief Conservator of Forest (PCCF) and HoFF u R. S. Gill, ban dawa ïa ka tnat Forest ba ka dei ban kyndang naphang ïa ki briew kiba shna ing be-aiñ ha ka jaka jong ka tnat Forest ha Mahadev Khola.
Ha ka dorkhas ba la soi da u President u samla Reuben Najiar bad u Secretary u samla Jason Laloo, ka seng ka la aiti ruh ïa ka jingthoh ba ka tnat Forest ka la ai jingbit tang ban shna ïa ka Temple ha ka 5 tarik, Nohprah, 1923.
“Ka jingai jingbit ka la kren shai, “bym dei ban shna ïa ki ing ki sem, lane ban pynkylla sha kino kino ki bynta ïa ka jaka lane ïa ka temple ba la tyrwa khlem da ïoh jingbit,” la pynpaw ka seng ïa ka jingthoh ba la kdew ha ka jingai jingbit.
“Ka Seng ka la kwah ban pynpaw ba ki briew kiba sah be-aiñ ha Mahadev Khola ki la nang kharoi ha kine ki khyndiat snem bad kam don kano kano ka jingpeitngor namarba ka dei ka jaka jong ka tnat Forest bad ka Dorbar Shnong ruh ka pynpaw ba kam don bor satia halor ka Mahadev Khola. Ïa ki ing dewbilat, ki ing basa, bad ki dukan la shu shna khlem da ïoh jingbit na ki bor ba dei peit. Ïa ki jakhlia bad ki jaboh la shu pyntuid beit beit sha ka wah duid kaba don hajan kaba la pynjngut bad pynjaboh ïa ka wah baroh kawei,” la pynpaw ka Seng.
“Ha kane ka jaka, la sakhi ruh ïa ki jingjia ba har rukom, ki kam tuh kam thiem bad kane ka jaka ka la kylla long ka ktem jong ki briew kiba ju im kyrni ha u drok bad ka la pynsyier mynsiem ruh wat ïa ki trai shnong kiba ju ïaid lynti bad ïa kiba sah marjan bad kane ka jaka,” la pynpaw shuh shuh ka Seng.
Ka Seng ka la pynkynmaw ruh ha u PCCF, ba ka ladep aiti ïa ka dorkhas ha ka 5 tarik u Naitung, 2023 sha u Division Forest Officer, East Khasi Hills (T) Division, Shillong u I.A Mathuram.
Ka seng ka la pynpaw ruh ïa ka jingpyrshah ha ka dorkhas hadien ba la lap ba ki briew kiba sah ha Mahadev Khola ki la aplai na ka tnat Forest ban pynkylla ïa kane ka jaka sha ka jaka sah briew.
“Ngi pyrshah jur ïa ka aplikeshon bad ka tnat Forest kam dei satia ban pdiang hynrei ka dei ban kyndang naphang ïa ki briew kiba sah beain bad ban pynduh pyndam shisyndon ïa ki jingtei beain khlem da pynslem namarba ka Mahadev Khola kan kylla long ka jaka rieh tngen jong ki briew kiba wan nabar,” ong u President ka Seng ha ka jingïakren bad ki lad pathai khubor hadien ka jingïakynduh ïa u PCCF.
Shuh shuh u la ong, “lada ka tnat Forest ka ai jingbit ban pynkylla shnong ïa ka Mahadev Khola, namar kata, ka dei ban ai jingbit ruh ïa ki trai jylla ban shna iing ha ki khlaw jong ka tnat Forest.”
Ha kaba ïadei bad kane, u Principal Chief Conservator of Forest (PCCF) u la ïathuh sha ki nongïalam ka KSU ba ka jingsorjamin bad ka jingtohkit ka dang ïaid shakhmat bad lada donkam ban kyndang ïa ki briew kiba sah beain ha Mahadev Khola ka tnat Forest kan sa pan jingïarap na ka ophis ka Deputy Commissioner bad na ka ophis u Superintendent of Police ka East Khasi Hills District.