Jurip ka RBPC ïa ka jaka theh ñiut ha Umshangling, dawa pyntreikam ïa ka Solid Waste Management

Nongpoh, Naiwieng 29: Ki nongïalam ka Ri Bhoi Peoples Council (RBPC), Nongpoh Circle mynta ka sngi ka la leit ban jurip ïa kawei na ka jaka theh niut ka sor Nongpoh kaba don ha ka shnong Umshangling, kaba dei halor ka nongrim ba ka seng ka la ioh jingtip ba ki paidbah ki la shah ktah na ka jingbret pathar ïa ki jaboh ha katei ka shnong.
Ha kane ka jingleit jurip la ïalam da u Bah Mission Tron, President ka RBPC Nongpoh Circle bad la sakhi lang ruh da ka jingdon lang u Secretary Shnong u Bah Vincent Sohkhwai, u Assistant Secretary Shnong u Bah Nicholas Buhphang lem bad ki dkhot ka RBPC Nongpoh Circle.
Ha kane ka jingleit jurip, ki nongïalam ka RBPC ki la lap shisha ba ka don ka jingbret pathar ïa ki jaboh kaba ktah ym tang ïa ka mariang bad ka ktah ruh ïa ka koit ka khiah ki paidbah nongshong shnong, namar ïa ki jaboh la shu bret pathar khlem da don kano kano ka jingpyrkhat ïa ka koit ka khiah ki paidbah nongshong shnong.
Ha kane ka sngi, na ka liang u Secretary Shnong u Bah Vincent Sohkhwai bad u Assistant Secretary Shnong, ki la ïathuh ba kane ka jingbret pathar ïa ki jaboh ka la ka la ktah shisha ïa ka koit ka khiah ki paidbah bad ka long ruh kaba sngewkhia ba ki paidbah ki hap ban ring mynsiem da ka lyer kaba sma iwtung kaba mih na katei ka jaka theh niut.
Ki la ïathuh ruh ba ïa katei ka jaka theh niut la thmu ba pynlong kum kata ka Solid Waste Management ba la plie naduh u snem 2019, hyrnei kaba sngewsih ba ïa ki kor ki bor ym shym la lah ban pyntreikam bad haduh mynta la shu bret pathar ïa ki jaboh kaba la ktah shisha ïa ki paidbah nongshong shnong.
Na ka liang u Bah Mission Tron kum u nongïalam ka RBPC u la kyntu ïa ka sorkar bad ki nongmihkhmat ba ki dei ban shim khia halor kane ka kam, namar kumba la lap da ka seng ka jingbret pathar ïa ki jaboh ka la ktah shisha ïa ka koit ka khiah ki paidbah.
Shuh shuh, u la ong ruh ka seng kan dang buddien bad ka dawa ruh ban pyntreikam noh ïa katei ka Solid Waste Management bad lada ka sorkar bad ki bor ba dei peit ki leh mynthi ka seng kam banse ban shim noh da kiwei ki lynti, ba kane ka jingbret pathar ïa ki jaboh ka la ktah shisha ïa ka koit ka khiah ki paidbah nongsnong shnong, u la bynrap.