Jurip ka KSU ïa ka Wah Kynshi ha Ranikor ïa ka jingkylla rong bad ïap ki dohkha

Mawkyrwat, ‘Nailur, 07: Ka Khasi Student’s Union (KSU) jong ka South West Khasi Hills District ha ka 05/09/2022 hapoh ka jingïalam u bah Forwardman Nongrem, President ka KSU South West Khasi Hills District bad u samla Jiedskhem Nongsiej, General Secretary ka KSU South West Khasi Hills District ki la hiar sha ki thaiñ Ranikor na ka bynta ban leit jurip ïa ka Wah Kynshi (Wah Ranikor) kum shibynta ban bud dien namar ka jingbym pyllait paidbah jong ka Meghalaya State Pollution Control Board ïa ka kaiphod ba kaba pynlong ïa kane ka wah ba kan kylla rong bad ka jingïap dohkha ba man ka snem khamtam ha ki bnai shwa ban slap.
Kum ban shu pynkynmaw, ka MSPCB na ka por sha ka por ka ju shim nuksa ne sample ïa kane ka wah bad ka sien ba khatduh ka dei ha ka snem 2019 hynrei kaba lyngngoh ka long haduh mynta ym shym la pyllait paitbah ïa ka kaiphod.
Ha kane ka sngi, ka seng ka la lap ba ka jingjaboh kane ka wah ka lah ban dei na ka jingdrill uranium bad tih dewïong ha ki por mynshwa ha kaba ka la buh jingeh ïa ki paidbah jong ka thaiñ bad kumjuh ka la wanrah ruh ka jingpynjaboh ïa kane ka wah Kynshi.
Ka seng ha kane ka juh ka sngi ka la kren shai ruh ba kan dang ïai pyrshah halor ka jingthmu buh Coke Factory jong ki kompany bad ‘riew shimet ha ka thaiñ Nongjri da kaba kdew ba kane kan sa ktah ym tang ïa ka lyer, ka mariang ne kan pynjaboh shuh shuh ïa kane ka wah hynrei kan buh jingma ruh ïa ka koit ka khiah jong ki paidbah.
Ka seng ka la buh jingkylli ruh ba don aïu sha lyndet ïa ka jingthmu buh Coke Factories ha kato ka thaiñ haba ban tih dewïong ruh la khang mynta la jan 10 snem? Naei ki Coke Factories ba ki pyrshang tei lymda kin ïoh dewïong haba la dep khang ban tih?? Kane ka pyni ba ka don ka jingthmu ban tih beaiñ ïa u dewïong hapoh ka thaiñ watla haba la khang da ka NGT kumba long mynta.
Ka seng ka maham namarkata, ba lada ki trai jaka, ki ‘riew shimet ne ki kompani kim sangeh mardor ban pynï ïa ki Coke Factories, ka seng kam banse ban leit jurip ha man ki jaka ban lap la ka don ne em ka jingtih beaiñ ïa u dewïong ban kit sha kita ki Coke Factories ba la tei hapoh ka thaiñ.
Ka seng ka ïai ban ba dei ban sangeh mardor ban ïaid shakhmat halor ki Coke Factories ha ka thaiñ Nongjri namar kane kan sa buh jingeh ïa ki nongshong shnong, ïa ka mariang bad ïa ka umbam um dih bad lada kin ïaid shakhmat, kum ka seng kam banse ban ï shakhmat da ki kam halor kane ka bynta.