Jurip ka HITO ia ka MCH Hospital Umran, dang slem ban plie ba ym biang pura kum ka jaka ai jingsumar

Nongpoh, Naiwieng 17 : Ki nongïalam ka HITO, Ri-Bhoi District hapoh ka jingïalam u Bah Ban Kharnaior kum u President, haka jingdon lang u Bah Elvis Kyrsian, Bah Kenny Nongrum, ki nongïalam shnong ba kynthup ïa u Bah Pynshngaiñ Marbañiang Rangbah Shnong kila leit ban jurip ïaka Maternity and Child Hospital kaba don ha Umran Parila, hadien ba u MLA barim ka Umsning u Dr. Celestine Lyngdoh u la pynpaw dangshen ba ka sorkar ka dei ban plie noh ïa katei ka jaka sumar naka bynta ka jingmyntoi jong ki paidbah.
Ha katei ka jingjurip jong ki nongïalam ka seng kala lap shibun ki jingduna ha katei ka Hospital naduh u surok, ka thungkam thungkam, ki nongtrei bad baroh ki jingdonkam ha katei ka hospital kaba ym pat I don jingkyrmen ban plie noh ïa ka, hynrei naka liang ka seng kala pynpaw ba ka jingkren u MLA barim ka Umsning u Dr C Lyngdoh ka long kaba bakla bad ka sorkar ka dei ban peit bñiah bad plie tad haduh ban da lah ban pynbiang lut ki jingdonkam baroh.
Kitei ki nongïalam ka seng, kila pynpaw ruh ba ka jingkren jong u Dr C Lyngdoh bala dep ïaka Building, bala don ruh ki oxygen plant, ki Generator kala long kaba bakla, ba katei ka jaka sumar haduh mynta kam pat biang pura bad kum ka seng kala pynpaw ba ka sorkar ka dei ban plie tad haduh ban da biang lut ki jingdonkam baroh ban myntoi pura ki nongshong shnong ka thaiñ Ri-Bhoi, ym ban plie tang ka ruh suda naka bynta ka jingmyntoi jongno re jongno, la bynrap kitei ki nongïalam ka HITO.