Jur ka jingshaniah jingïarap pisa ka KHADC nabar ban ïa kaba don nalade, ong ka CAG

Shillong, K’ Lyngkot 07: Na ka daw ba ka jingshaniah palat ïa ki lad jingïarap pisa kiba wan nabar ban ïa ka pisa kiba don nalade, la mynjur ba ka Khasi Hills Autonomous District Council (KHADC) kan dei ban ai ki jingkheiñ mang tyngka kiba bniah bad ban bishar ïa ki khajna kiba lait sharud bad ka jingmang ïa ki khajna ki dei ban long kiba shai.
Katkum ka kaiphod ka CAG, ka jingkhmih ïa ki jingmang pisa na ka bynta ka snem 2018-19 kaba ïaid lang bad ki receipt ba shisha bad kumjuh ruh ki jingpynlut ba la pynpaw kiba don jingïapher hapdeng ki budget estimate bad ki jingkheiñ ba la pynpaw lyngba ki receipt bad expenditure.
Ha ka snem 2018-19, ka receipt ba la paw bad ka jingpynlut jong ka KHADC ka la duna ïa ka BE da 70 bad 40 per cent kumjuh.
Kane ka jinghiar ne jingduna hapdeng ka BE bad ka jingïohlum kumba la pynpaw lyngba ka khajna na ka bynta ka snem 2018-19 kuma la kren hajrong ka pynpaw ba ka KHADC kam shym la lah ban lum bha ïa ka khajna kumba la kdew hapoh ka BE.
Ha kawei ka liang ka Audit ka la shem ba ka Council ka la pyndonkam tang T. 127.72 klur (49 percent) jong baroh ka pisa ba don (T. 262.86 klur) ha ka snem 2018-19, ha kaba na kane 23 per cent la pynlut ha ka revenue expenditure (T. 58.58 klur) katba 26 per cent la pynlut ha ki capital project (T. 69.00 klur) jong ka Council.
Na ka liang u Secretary ka Executive Council, ka KHADC u la ong ba ha u Nailar 2022 ba ki la don ki sienjam ba la shim ban pynbha ïa ka jingmang tyngka khnang ba kan long ka mang tyngka kaba beit bad ba shai.
Ka la pynpaw shuh shuh ba pyrshah ïa baroh ka jinglum ïa ka khajna kaba long T. 64.66 klur, ka jingsam bynta ha ka royalty halor ki Mines & Minerals bad ki taxes halor ki kali jong ka KHADC bad ka GIA kaba la kheiñ lang na ka bynta ka 70 per cent kaba kdew ïa ka jingshaniah jong ka KHADC na ki bor kiba nabar halor ka jingdonkam ïa ka pisa ban ïa ka pisa kaba ka don nalade.
Halor ka total revenue expenditure kaba dei T. 58.58 klur, ka Secretariat General Service, Public Work bad ka Forest kaba baroh kaba la kheiñ kumba 60 per cent ka la buh ïa ka percentage kaba rit na ka bynta kiwei pat ki tnat jong ka jingpynlut kaba kynthup ïa ki tnat kiba kongsan kum ka Land Revenue, Arts & Culture bad Public Health Sanitation bad Water Supply.
Ka jingïapher hapdeng ki BE bad ki actual receipt bad ka jingpynlut ha ka snem 2018-19 ka kdew ba ka KHADC ka la pynkhreh ïa ki BE khlem da shim ïa ka bynta kaba dei rukom.
Ka CAG shuh shuh ka la pynpaw ba ka Council ka lah ban shim ki sienjam ban kyntiew ïa la ki jong ki jinglum khajna khnang ba kin lah ban pynbha ïa ki rukom pynlut ha ki prokram bad ki scheme jong ka Council. Ka la ong ba ka Council ka donkam ban wad ki lad ki lynti kumno ba pyndonkam ïa ka pisa kaba don ha ka rukom kaba biang, ka la bynrap.