Khliehriat Jymmang, 20: Ha kaba ïadei bad ka jingmih palat u pum-pum na ka jingshna ïa ka surok ha Khliehriat kaba la ktah shikatdei eh ïa ki nongleit nongwan, ki paidbah kiba sah marjan bad khamtam eh ïa ki khynnah skul kiba ïaid lyngba kane surok, ka Jaiñtia National Council (JNC) Khliehriat Circle, hynnin ka sngi hapoh ka jingïalam jong u Working President, u bah Diamon Bareh, u General Secretary, bah Symboh Sumer, ka la leit ban iakynduh markhmat bad u Site Engineer jong ka Purbanchal Buildtech Pvt. Ltd. kaba peit ïa ka jingpyntrei ha ka jingmaramot ïa ka surokbah ha ka thaiñ Khliehriat.
“Kum ban shu pynkynmaw, ka JNC Khliehriat Circle dang ha kine ki khyndiat taiew ba la dep ka la buh ruh da ka jingthoh sha u Deputy Commissioner, East Jaiñtia Hills District ha kaba ka seng ka la kyrpad ïa u DC ban bthah ïa ki nongshna kiba shna ïa ka surok ba kin da synreit um arsien shi sngi khamtam ha ka por ba shit ba rang ka sngi ban pynduna ïa ka khyndew pum pum katba ka jingshna ïa ka surok ka dang ïaid, hynrei wat la u DC u la dep btah ruh hynrei la iohi pynban ba kiba trei ïa ka surok kim shym la bud satia ïa kane ka jingbthah”ong u kyrwoh na ka seng.
Halor ka jingbym ngeit ki nongtrei ban synreit um ïa ka surok ban duna ka pumpum, kitei ki nongïalam jong ka JNC Khliehriat Circle ki la leit ban iakynduh markhmat bad u engineer ban kyntu jur ïa u Engineer ban leh ïa kaba donkam khnang ban lait na ka jingshah ktah jong ki paidbah bad kumjuh ïa ki khynnah skul kiba ïaid na kane ka surok.
La ong ba na ka liang jong u engineer u la ai ka jingkular ban shimkhia, kata ban bthah ïa ki nongtrei ban synreit um ïa ka surok arsien shisngi. “Ngin dang peitngor bha bad ngin sa buddien ruh na ka bynta kane ban pynshisha ba la ki bud ne em ïa kaba ki la kular, namar ka koit ka khiah hi jong ki paidbah ka dei ban long kaba kongsan eh” ong u kyrwoh na u Working President ka JNC Khliehriat Circle.
