Jur ka jingpom pathar ïa ki khlaw ban thang rnga bad dieng shalan ha South West Khasi Hills

Mawkyrwat, Ïaïong 07 : Ka jingpom pathar ïa ki khlaw ki btap ha South West Khasi Hills ka dang ïai bteng ym tang na ka bynta ban shalan ïa ki dieng sha ki karkhana kiba don ha kylleng ki jaka, hynrei kaba kham i-sangsot ka long ka jingpom pathar ïa ki khlaw ka long ruh na ka bynta ban thang rnga ban shalan ïa u ha kiwei de ki jaka.
Lah ban kdew ba kane ka kam khaïi rnga ka kham duna ha ka por lyuir hynrei tang mar shu sdang kane ka aïom tlang kane ka kam khaïi ka la thnam biang ha kaba la ïohi ba ym tang sha ki thaiñ West Khasi Hills District jong ka jylla Meghalaya kaba la ju bna nam bha ïa kane ka kam khaïi bad thang rnga, hynrei ha kine ki sngi wat ka South West Khasi Hills District ruh ha kane ka kam khaïi rnga ka la ïeng rasong bha.
Ïa kane la shem ha ka jingleit jurip jong ki nongthoh khubor napoh ka South West Khasi Hills District ha kaba la lap ba bun tylli ki shnong ha ki thaiñ Warsanlyngdoh kiba dang bteng haduh mynta ïa kane ka kam thang rnga bad khaïi ïa u. Ym tang kata, la lap ruh bun tylli ki jaka ba don ki dang lum thup ïa u rnga ha shi lynter ka surok ba dei ïaid na Wahkaji – Pyndenumjaraiñ haduh Nongriñiang bad ki shnong ba marjan.
Ymtang kata, kum kane ka jingleh ka pynlyngngoh ruh halor ka jingbym tuklar jong ka Assembly Committee on Environment, ha kaba ki ong ba katkum ka jingsngewthuh jong ki, ka ktien environment ka kynthup ruh ïa ki khlaw ki btap bad ka jingpynjot bad pom pathar khlem kheiñ shuh ïa ki dieng kiba rit ba ria ban thang rnga haduh ba ki khlaw kin da synlen lut khait ka ktah haduh katta katta ïa ka mariang kum ka jinglynshop jong ki bor ka mariang kum ki erïong erngit, ka jingtwa ki lum ki wah ha ka por slap na ka daw jong ka jingbym skhem shuh ka khyndew, namar ym don shuh ki thied dieng kiba kjit ïa ka jingsngem ka khyndew ka wanrah ïa ka jingjot jong ki ïing ki sem jong ki nongshong shnong.