Jur ka jingïaknieh tiket NPP ha Sohïong bad Sohryngkham, pan por ka Mawlai

Shillong, Nohprah 08 : Ka jingïaknieh tiket na ka NPP na bynta kane ka elekshon MDC kaban sa long shen ka la shongshit bha ha ki katto katne tylli ki constituency nalor ba ki don ruh ki jaka haduh ba ki Block kim lah shuh ban rai namar baroh kiba pan ki dei kiba biang suda.
Katkum ka jingïathuh da u Working President ka National People’s Party (NPP), Bah Hamlet Dohling, la ïathuh ba ha Sohiong ki la don haduh lai ngut kiba pan tiket. “Kine ki kynthup lang ruh ïa u MDC ba mynta Bah Sherbor Mawlong. Na ka liang ka Block kam lah shuh ban rai ïano ban ai kumta ka la phah ïa baroh lai tylli ki kyrteng sha ka Election Committee,” u la ong.
Nangta u ïathuh ba wat ha Sohryngkham, ka constituency kaba mihkhmat da u CEM ba mynta, Bah Pynïaid Sing Syiem (uba la jied ban leit ïakhun noh na Nongthymmai), ka don ka jingïaknieh tiket. Kumta u la ong ba hangne ruh na ka liang ka Party ka hap ban bishar bniah bha ban jied ïa u kyrtong ba biang.
Haba ïadei pat bad ka Jirang, na ka liang u Bah Hamlet u la ïathuh ba watla kadei ka jingshisha ba ki don u MDC, Bah Victor Ranee hynrei ki hap pat ban sngap ia ka sur na ka Block ha shwa ba kin jied ia u kyrtong.
La ïathuh ba ha Mawlai ruh ka don ka jingpan por na ka Block ban ïa kren shwa halor u kyrtong.
Halor ki khubor ba ka Party ka thmu ban ym sei kyrtong ha Mawkhar bad Jaïaw, u Bah Hamlet u la ïathuh baki don ki Block kiba pyntip ba don kiba kwah ban aplai tiket hynrei na ka liang ka party ka ai jingmut ïa ki ba kin hap ban peit thuh ha shwa ba kan ai tiket.
“Ngim lah ban shu ai tiket kat ïa kiba pan namar ïoh uto uba pan tiket un ïoh tang 400 ne 500 vote,” u la ïathuh shuh shuh.
Shuh shuh haba jubab halor ka jingkylli, u Bah Hamlet u la iathuh ba jan man ka constituency ka don beit ka jingïaknieh tiket da kaba ai nuksa kum ha Mylliem watla ki don haduh 6 ngut kiba pan hynrei na ka Block ka la pynbeit bad pynsngewthuh ïa ki para kyrtong khnang ban ïoh tang uwei uba ïa mon lang.
“Da kaba ngi leh kumne kan pynsuk ïa ka State Election Committee ban rai. Hynrei na bynta kito kiba ym lah ban rai ka shong pat ha ka State Election Committee ban bishar bniah bad peit pyrman ïano ban ai.”
Lah ban kdew hangne ba ka NPP ha ka kylla kaba nyngkong ka la dep ban pyllait haduh 18 ngut ki kyrteng na bynta ka elekshon MDC ha KHADC bad 20 ngut pat ki kyrtong na bynta ka JHADC.