Jur ka dheng kali ha surok NH-6 ha Tongseng na ka daw ka jingjulor kaba la palat ha jingkieng ha Tongseng

Khliehriat, Naiwieng 19: Ka jing jur ka jingdheng kali ha ka national highway ha Narpuh ka la wanrah jingeh haduh katta katta ïa ki nongleit nongwan khamtam eh ïa ki kali kiba kit nongpang, kane ka jingdheng kali ka jur bha ha Tongseng, namar ba ka jingsniew bad jingjulor ka surok ka la long shaba palat khamtam ha jingkieng Tongseng.
Ki thymmei khubor ki ïathuh ba ka jingsniew bad jingjulor ka surok ha Tongsneg khamtam ha jingkieng, ka buh jingma ruh ïa ki mynsiem briew, namar ha katei ka bynta, ki jingker kiba ker ïa ka jingkieng ruh ki la julor bad ka surok ruh ka dap tang da ki thliew kiba heh kiba buh jingeh bad buh jingma ïa ki kali ban ïaid.
Kat haduh ba thoh ïa kane ka khubor, ki thymmei khubor, ki iathuh ba ka jingdheng kali ka dang jur bha ha ka thaiñ ha kaba wat ki kali kit nongpang (Ambulance) ruh ki la sahkut bad hap ban ieng laiñ lang ha ka jingdheng kali.
Ki paidbah jong ka thaiñ Tongseng, Narpuh man ka por ki la pynpaw ka jingsngew khia halor kane ka jingsniew palat ka surok bad ong ruh ba ki kynduh jingeh bha khamtam haba don kino kino ki kam kiba kyrkieh namar ka jingdheng kali ka ju neh bun kynta ha surok bah national highway bad ong ruh ba lada ka surok ka dang ïai long sah kumne kumne, ym lah shuh ban tip kaei ka ban jia ïa ki nongleit nongwan bad ïa kito kiba pang ba shitom kiba kit ha ki kali kit nongpang bad ha ki kali shimet bad ong ruh ba balei kane ka sorkar ka la shu ieh beiñ bad leh mynthi haduh katne khlem pyrkhat shuh ïa ki paidbah kiba ïaid lyngba na kane ka surok.